ഡൽഹി: പഹൽഗാം ഭീകരാക്രമണത്തിന്റെ പശ്ചാത്തലത്തിൽ മുന്നറിയിപ്പില്ലാതെ ഉറി ഡാം തുറന്നു വിട്ട് ഇന്ത്യ. ഇതിനു പിന്നാലെ ഝലം നദിയിൽ വെള്ളപൊക്കം ഉണ്ടാവുകയും ചെയ്തു. പാകിസ്താൻ അധീനതയിലുള്ള കശ്മീരിലെ വിവിധ സ്ഥലങ്ങളിലും വെള്ളം കയറുകയും ചെയ്തു. കശ്മീരിലെ ഹത്തിയൻ ബാല ജില്ലയിലെ താഴ്ന്ന പ്രദേശങ്ങളിലാണ് കൂടുതൽ പ്രശ്നങ്ങൾ ഉണ്ടായത്. വെള്ളപൊക്കം നടന്നതിന് പിന്നാലെ നദീ തീരത്തുള്ള ആളുകളെ സുരക്ഷിതമായ സ്ഥലങ്ങളിലേക്ക് മാറ്റി പാർപ്പിക്കുകയും ചെയ്തു. സിന്ധു നദിയിലെ ജല കരാർ മരവിപ്പിച്ചതിന് ശേഷമുള്ള ഇന്ത്യയുടെ ആദ്യത്തെ പ്രധാന നടപടി കൂടിയാണിത്. 

പാകിസ്താനെതിരെയുള്ള നയതന്ത്രങ്ങളുടെ കാര്യത്തിൽ ഇന്ത്യ കനത്ത തിരിച്ചടികൾ തുടരുന്നതിന്റെ സാഹചര്യത്തിലാണ് ഉറി ഡാം തുറന്നു വിട്ടത്. ഇന്ത്യയുടെ ഈ നടപടിയെ പാകിസ്താൻ ശക്തമായി അപലപിക്കുകയും ചെയ്തു. അന്താരാഷ്ട്ര മാനദണ്ഡങ്ങളുടെയും സിന്ധു നദിജല ഉടമ്പടിയുടെയും ലംഘനമാണ് ഇതെന്ന് പാകിസ്താൻ ആരോപിച്ചു. 

അതേസമയം ചൊവ്വാഴ്ച്ചയാണ് രാജ്യത്തെ ഞെട്ടിച്ച ജമ്മു കശ്മീരിലെ ഭീകരാക്രമണം നടന്നത്. അക്രമത്തിൽ 27ലധികം നിരപരാധികളായ വിനോദസഞ്ചാരികൾ ആണ് കൊല്ലപ്പെട്ടത്. ട്രക്കിങിനായി പോയവർക്ക് നേരെയാണ് ആക്രമണം നടന്നത്. 2019ന് ശേഷം ജമ്മു കശ്മീരിൽ നടക്കുന്ന ഏറ്റവും വലിയ ഭീകരാക്രമണമാണ് പഹൽഗാമിൽ നടന്നത്. അജ്ഞാതരായ തോക്കുധാരികൾ വിനോദസഞ്ചാരികൾക്ക് അടുത്ത് വന്ന് വെടിയുതിർക്കുകയായിരുന്നുവെന്ന് ദൃക്സാക്ഷികൾ പറഞ്ഞത്. 

India retaliates against Pakistan Uri dam opens without warning floods Jhelum river