ന്യൂഡല്‍ഹി: വടക്കുപടിഞ്ഞാറന്‍ ഡല്‍ഹിയിലെ രോഹിണി പ്രദേശത്ത് വന്‍തീപിടുത്തം. ഞായറാഴ്ച രാവിലെയാണ് പ്രദേശത്ത് തീപിടുത്തമുണ്ടായത്. തീപിടുത്തത്തില്‍ രണ്ട് കുട്ടികള്‍ മരിക്കുകയും നിരവധി പേര്‍ക്ക് പൊള്ളലേല്‍ക്കുകയും ചെയ്തു. 

രോഹിണിയിലെ സെക്ടര്‍ 17ലെ ശ്രീ നികേതന്‍ അപ്പാര്‍ട്ട്‌മെന്റിന് സമീപമാണ് സംഭവം. പ്രദേശത്ത് വന്‍തോതില്‍ പുക ഉയര്‍ന്നു. തുടര്‍ന്ന് തീ നിയന്ത്രണവിധേയമാക്കാന്‍ അഗ്‌നിശമന സേനാംഗങ്ങള്‍ സ്ഥലത്തെത്തുകയായിരുന്നു.

തീപിടുത്തത്തില്‍ രണ്ടു കുട്ടികള്‍ മരിച്ചതായും നിരവധി പേരെ ഗുരുതരമായ പൊള്ളലേറ്റ നിലയില്‍ ആശുപത്രിയില്‍ പ്രവേശിപ്പിച്ചതായും ഉദ്യോഗസ്ഥരെ ഉദ്ധരിച്ച് വാര്‍ത്താ ഏജന്‍സിയായ ഐഎഎന്‍എസ് റിപ്പോര്‍ട്ട് ചെയ്തു.

'ഇതുവരെ രണ്ട് മൃതദേഹങ്ങള്‍ കണ്ടെടുത്തു. പ്രദേശത്ത് നിന്ന് പുക ഉയരുന്നത് കാണാമായിരുന്നു,' ഒരു മുതിര്‍ന്ന പൊലിസ് ഉദ്യോഗസ്ഥന്‍ പറഞ്ഞു. 

'അഗ്‌നിശമന സേനാംഗങ്ങള്‍ നിലവില്‍ തീ അണയ്ക്കാന്‍ ശ്രമിക്കുകയാണ്, സ്ഥിതിഗതികള്‍ നിയന്ത്രണവിധേയമാക്കാനുള്ള ശ്രമങ്ങള്‍ പുരോഗമിക്കുകയാണ്,' അദ്ദേഹം പറഞ്ഞു. 400ലധികം കുടിലുകള്‍ തീപിടുത്തത്തില്‍ കത്തിനശിച്ചതായി പൊലിസ് വ്യക്തമാക്കി.

'ഒന്നിലധികം അഗ്‌നിശമന സേനാ യൂണിറ്റിനെ സ്ഥലത്ത് വിന്യസിച്ചിട്ടുണ്ട്. സംഭവസ്ഥലത്തു നിന്ന് രണ്ട് മൃതദേഹങ്ങള്‍ കണ്ടെടുത്തു,' ഡെപ്യൂട്ടി പൊലിസ് കമ്മീഷണര്‍ അമിത് ഗോയല്‍ പറഞ്ഞു.

അതേസമയം ന്യൂഡല്‍ഹിയില്‍ മറ്റൊരിടത്തും തീപിടുത്തമുണ്ടായിരുന്നു. ഞായറാഴ്ച ഉച്ചകഴിഞ്ഞ് ശക്കര്‍പൂര്‍ പൊലിസ് സ്റ്റേഷന്‍ പരിധിയിലുള്ള ദേശീയ തലസ്ഥാനത്തെ ഐടിഒയ്ക്ക് സമീപമുള്ള വനത്തില്‍ വന്‍ തീപിടുത്തമുണ്ടായിരുന്നു. തീപിടുത്തത്തില്‍ ആളപായമൊന്നും റിപ്പോര്‍ട്ട് ചെയ്തിട്ടില്ലെന്ന് ഡല്‍ഹി ഫയര്‍ സര്‍വീസ് ഡിപ്പാര്‍ട്ട്‌മെന്റ് ഉദ്യോഗസ്ഥര്‍ പറഞ്ഞു. ലക്ഷ്മി നഗറില്‍ നിന്ന് ഐടിഒയിലേക്കുള്ള വഴിയിലെ മരങ്ങള്‍ക്ക് തീപിടിച്ചതായി ഉച്ചയ്ക്ക് വിവരം ലഭിച്ചതായി ഗീത കോളനി ഫയര്‍ സ്റ്റേഷന്‍ സബ് ഓഫീസര്‍ ഭീംസെന്‍ എഎന്‍ഐയോട് പറഞ്ഞു.

A devastating fire has erupted in Delhi's Rohini area, claiming two lives and leaving several injured. Emergency teams are at the scene, working to control the flames. Stay updated on the latest developments and the impact of this tragic event.