ജിദ്ദ: മധ്യ സഊദി അറേബ്യയിലെ അല്‍ ഖാസിം മേഖലയില്‍ ശക്തമായ പൊടിക്കാറ്റ് വീശിയടിച്ചു. മീറ്ററുകളോളം ഉയരത്തിലും കനത്തിലും പൊടിപടലങ്ങള്‍ വഹിച്ചുള്ള ശക്തമായ കാറ്റ്മൂലം പ്രദേശമാകെ മൂടുകയും അവിടെ ദൃശ്യപരത ഗണ്യമായി കുറയ്ക്കുകയും ചെയ്തുവെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

ശനിയാഴ്ച ഉച്ചകഴിഞ്ഞ് ശക്തമായ കാറ്റിനൊപ്പം വീശിയ കൊടുങ്കാറ്റ് പ്രദേശത്തെയാകെ ഇരുട്ടിലാക്കുകയും മരങ്ങള്‍ കടപുഴകി വീഴാന്‍ കാരണമാുകയും ചെയ്തു.

അല്‍ ഖാസിമിന്റെ ചില ഭാഗങ്ങളില്‍ ദൃശ്യപരത പൂജ്യത്തിനടുത്ത് എത്താന്‍ സാധ്യതയുള്ള സജീവമായ കാറ്റ് ബാധിക്കുമെന്ന് കഴിഞ്ഞദിവസം സൗദി നാഷണല്‍ സെന്റര്‍ ഓഫ് മെറ്റീരിയോളജി (എന്‍സിഎം) മുന്നറിയിപ്പ് നല്‍കിയിരുന്നു. കൂടാതെ കാലാവസ്ഥാ മുന്നറിയിപ്പുകള്‍ നിരീക്ഷിക്കാനും സുരക്ഷാ മാര്‍ഗ്ഗനിര്‍ദ്ദേശങ്ങള്‍ പാലിക്കാനും ജനങ്ങളോട് അഭ്യര്‍ഥിച്ചതിനാല്‍ ഈ സമയത്ത് ആളുകള്‍ ഏറെക്കുറേ വീട്ടില്‍ തന്നെയിരുന്നു. 

ജസാന്‍, അസിര്‍, അല്‍ ബഹ, മക്ക, റിയാദ്, അല്‍ ഖാസിം എന്നീ സൗദി പ്രദേശങ്ങളുടെ ചില ഭാഗങ്ങളില്‍ മിതമായതോ കനത്തതോ ആയ ഇടിമിന്നലുകളും ആലിപ്പഴ വര്‍ഷവും പൊടിക്കാറ്റും ഉണ്ടാകുമെന്നും കേന്ദ്രം പ്രവചിച്ചു.

സൗദി അറേബ്യയുടെ വടക്കുപടിഞ്ഞാറന്‍ ഭാഗങ്ങളിലും കിഴക്കന്‍ പ്രവിശ്യയിലും വടക്കന്‍ അതിര്‍ത്തികളിലും നേരിയതോ മിതമായതോ ആയ കാറ്റ് പ്രതീക്ഷിക്കുന്നു. ഇത് വടക്കുപടിഞ്ഞാറന്‍ ഭാഗത്തുള്ള അല്‍ ജൗഫ്, തബൂക്ക് എന്നിവിടങ്ങളിലേക്കും വ്യാപിക്കും. 

Massive dust storm blankets Saudi region of Al Qassim