ശ്രീലങ്ക: 2025 വിമൺസ് ത്രിരാഷ്ട്ര പരമ്പരയിൽ സൗത്ത് ആഫ്രിക്കെതിരെ ഇന്ത്യക്ക് തകർപ്പൻ വിജയം. ശ്രീലങ്കയിലെ ആർ പ്രേമദാസ സ്റ്റേഡിയത്തിൽ നടന്ന മത്സരത്തിൽ 23 റൺസിനാണ് ഇന്ത്യ വിജയിച്ചത്. മത്സരത്തിൽ ആദ്യം ബാറ്റ് ചെയ്ത ഇന്ത്യ 50 ഓവറിൽ ഒമ്പത് വിക്കറ്റ് നഷ്ടത്തിൽ 337 റൺസ് ആണ് നേടിയത്. വിജയലക്ഷം പിന്തുടർന്നിറങ്ങിയ സൗത്ത് ആഫ്രിക്കയുടെ ഇന്നിംഗ്സ് 50 ഓവറിൽ ഏഴു വിക്കറ്റ് നഷ്ടത്തിൽ 314 റൺസിൽ അവസാനിക്കുകയായിരുന്നു. 

ജെമീമ റോഡ്രിഗസിന്റെ തകർപ്പൻ സെഞ്ച്വറിയുടെ കരുത്തിലാണ് ഇന്ത്യ മികച്ച സ്കോർ പടുത്തുയർത്തിയത്. 101 പന്തിൽ 123 റൺസായിരുന്നു ജെമീമ അടിച്ചെടുത്തത്. 15 ഫോറുകളും ഒരു സിക്സും അടങ്ങുന്നതായിരുന്നു താരത്തിന്റെ ഇന്നിങ്സ്. ദീപ്തി ശർമ്മ, സ്മൃതി മന്ദാന എന്നിവർ അർദ്ധ സെഞ്ച്വറിയും നേടി. 84 പന്തിൽ പത്ത് ഫോറുകളും രണ്ട് സിക്സുകളും ഉൾപ്പെടെ 93 റൺസ് ആണ് ദീപ്തി ശർമ നേടിയത്. 63 പന്തിൽ  51 റൺസ് ആണ് സ്മൃതി മന്ദാന നേടിയത്. ആറ് ഫോറുകളാണ് താരത്തിന്റെ ബാറ്റിൽ നിന്നും പിറന്നത്. 

ഇന്ത്യൻ ബൗളിങ്ങിൽ അമൻജോത് കൗർ മൂന്ന് വിക്കറ്റുകൾ നേടിയപ്പോൾ ദീപതി രണ്ട് വിക്കറ്റും നേടി തിളങ്ങി. സൗത്ത് ആഫ്രിക്കായി അനേറി ഡാർക്ക്‌സെൻ  80 പന്തിൽ 81 റൺസും ക്യാപ്റ്റൻ ക്ലോയി ട്രയോൺ 43 പന്തിൽ 67 റൺസും സ്വന്തമാക്കി.

India defeated South Africa by 23 runs in the 2025 Womens Tri-Nation Series at the R Premadasa Stadium in Sri Lanka