തിരുവനന്തപുരം: തെരുവുനായകളുടെ വന്ധ്യംകരണത്തിന് മൊബൈല്‍ എ.ബി.സി യൂനിറ്റുകള്‍ മൃഗസംരക്ഷണവകുപ്പ് ആരംഭിക്കുന്നു. നിലവില്‍ സ്ഥിരം സെന്ററുകള്‍ സ്ഥാപിക്കുമ്പോള്‍ പ്രാദേശികമായി വലിയ എതിര്‍പ്പുകള്‍ ഉണ്ടാകുന്നുണ്ട്. ഇത് ഒഴിവാക്കുന്നതിനാണ് മൊബൈല്‍ എ.ബി.സി യൂനിറ്റ് എന്ന ആശയം വകുപ്പ് ആവിഷ്‌കരിച്ചിരിക്കുന്നത്. 
മൊബൈല്‍ യൂനിറ്റ് ഒരു ട്രക്കില്‍ ഘടിപ്പിച്ച് ഏത് തുറസായ സ്ഥലത്തും സ്ഥാപിക്കാമെന്നതാണ് പ്രത്യേകത. തെരുവ് നായ ശല്യം രൂക്ഷമായ പ്രദേശത്ത് ഈ വാഹനം എത്തിച്ച ശേഷം നായ്ക്കളെ വന്ധ്യംകരണത്തിന് വിധേയമാക്കാന്‍ കഴിയും.  അഞ്ച് ദിവസത്തേക്ക് നായയ്ക്ക് പരിചരണം നല്‍കിയ ശേഷം അവിടെ തന്നെ തുറന്നുവിടും. ഇത് പൂര്‍ത്തിയായാല്‍ ദിവസങ്ങള്‍ക്കകം അടുത്ത സ്ഥലത്തേക്ക് യൂനിറ്റ് എത്തിക്കാന്‍  കഴിയുമെന്നതാണ് പ്രത്യേകത. ഓരോ യൂനിറ്റിലും പ്രതിദിനം 25 വന്ധ്യംകരണ ശസ്ത്രക്രിയകള്‍ നടത്താനും അഞ്ച് ദിവസത്തെ ശസ്ത്രക്രിയാനന്തര പരിചരണം നല്‍കാനുമുള്ള സംവിധാനമുണ്ടാകും. 15 ദിവസത്തിനുള്ളില്‍, 200 എ.ബി.സി ശസ്ത്രക്രിയകള്‍ വരെ പൂര്‍ത്തിയാക്കാന്‍ കഴിയും.

എ.ബി.സി നിയമങ്ങളിലെ എല്ലാ വ്യവസ്ഥകളും പാലിക്കുന്ന തരത്തിലാണ് മൊബൈല്‍ യൂനിറ്റ് രൂപകല്‍പന ചെയ്തിരിക്കുന്നത്. സ്ഥിരം എ.ബി.സി സെന്റര്‍ പോലെ എയര്‍ കണ്ടീഷന്‍ ചെയ്ത യൂനിറ്റില്‍ ഒന്നിലധികം സര്‍ജറി ടേബിളുകളും മാലിന്യ സംസ്‌കരണ സൗകര്യങ്ങളും ഉണ്ടായിരിക്കും. മൊബൈല്‍ യൂനിറ്റിന്റെ ഗതാഗതത്തിന് ജില്ലാ പഞ്ചായത്ത് ഫണ്ട് നല്‍കും. 
വന്ധ്യംകരണത്തിനായി തദ്ദേശ സ്വയംഭരണ സ്ഥാപനങ്ങള്‍ ഒരു നായയ്ക്ക് 2,100 രൂപ നല്‍കേണ്ടിവരുമെന്നാണ് ലഭിക്കുന്ന വിവരം. പദ്ധതിക്കായി സംസ്ഥാന സര്‍ക്കാര്‍ കഴിഞ്ഞ ബജറ്റില്‍ രണ്ട് കോടി രൂപയാണ് വകയിരുത്തിയിരിക്കുന്നത്.