ഡൽഹി: ഇന്ത്യയും പാകിസ്താനും തമ്മിലുള്ള വെടിനിർത്തൽ സ്ഥിരീകരിച്ചതിന് നിർത്തിവെച്ച ഐപിഎൽ അടുത്ത ആഴ്ച മുതൽ വീണ്ടും തുടങ്ങും. ഇന്ത്യയും പാക്കിസ്ഥാനും പൂർണമായും വെടിനിർത്തലിന് സമ്മതിച്ചതായി അമേരിക്കൻ പ്രസിഡന്റ് ഡൊണാൾഡ് ട്രംപാണ് വ്യക്തമാക്കിയത്. ധരംശാലയിൽ നടന്ന പഞ്ചാബ് കിംഗ്സ് - ഡൽഹി ക്യാപിറ്റൽസ് മത്സരം പാതിവഴിയിൽ ഉപേക്ഷിച്ചിരുന്നു. ജമ്മു, പത്താൻകോട്ട് എന്നിവിടങ്ങളിൽ അപായ സൈറണുകൾ മുഴങ്ങിയതിനെ തുടർന്ന് സ്റ്റേഡിയത്തിലെ വൈദ്യുതി വിച്ഛേദിക്കപ്പെട്ടിരുന്നു. തുടർന്ന് സുരക്ഷ മുൻനിർത്തി മത്സരം ഉപേക്ഷിക്കുകയായിരുന്നു. ഇതിന് പിന്നാലെ ഇന്നാണ് ബിസിസിഐ ഐപിഎൽ നിർത്തിവെക്കുന്നതായി അറിയിച്ചത്. 

ഐപിഎൽ വീണ്ടും പുനരാരംഭിക്കുമ്പോൾ വിദേശ താരങ്ങളുടെ ലഭ്യതയെക്കുറിച്ചുള്ള ഒരു പുതിയ റിപ്പോർട്ടാണ് ഇപ്പോൾ പുറത്തു വന്നിരിക്കുന്നത്. ബാക്കിയുള്ള ഐപിഎൽ മത്സരങ്ങൾ കളിക്കാൻ ചില ഓസ്‌ട്രേലിയൻ താരങ്ങൾ ഉണ്ടാവില്ലെന്നാണ് റിപ്പോർട്ടുകൾ. വേൾഡ് ടെസ്റ്റ് ചാമ്പ്യൻഷിപ് ഫൈനലിനായുള്ള തയ്യാറെടുപ്പുകൾക്കായി ഓസ്‌ട്രേലിയൻ താരങ്ങൾ നാട്ടിലേക്ക് മടങ്ങുമെന്നാണ്  ദി വെസ്റ്റ് ഓസ്‌ട്രേലിയൻ റിപ്പോർട്ട് ചെയ്യുന്നത്. 

ഓസ്‌ട്രേലിയൻ ടെസ്റ്റ് ക്യാപ്റ്റൻ പാറ്റ് കമ്മിൻസ്, ജോഷ് ഹേസൽവുഡ്, മിച്ചൽ സ്റ്റാർക്ക്, ട്രാവിസ് ഹെഡ്, മാർക്കസ് സ്റ്റോയിനിസ്, ജോഷ് ഇംഗ്ലിസ്, മിച്ചൽ മാർഷ്, നഥാൻ എല്ലിസ്, ആരോൺ ഹാർഡി, സേവ്യർ ബാർട്ട്ലെറ്റ് എന്നീ താരങ്ങളാണ് ഇപ്പോൾ ഐപിഎല്ലിൽ കളിക്കുന്നത്. പഞ്ചാബ് കിങ്സിന്റെ ഗ്ലെൻ മാക്‌സ്‌വെൽ നേരത്തെ തന്നെ പരുക്കേറ്റ് പുറത്തായിരുന്നു. 

ഐപിഎൽ വീണ്ടും തുടങ്ങുമ്പോൾ മത്സരങ്ങൾ നടത്താനായി ബിസിസിഐ മൂന്ന് വേദികൾ ഷോർട്ട്‌ലിസ്റ്റ് ചെയ്തിട്ടുണ്ടെന്നും റിപ്പോർട്ടുകൾ ഉണ്ട്. ഹൈദരാബാദ്, ബെംഗളൂരു, ചെന്നൈ എന്നീ വേദികളാണ് ബിസിസിഐയുടെ പരിഗണനയിൽ ഉള്ളത്. അതിർത്തിയിൽ നിന്നും വളരെ അകലെയാണ് ഈ മൂന്ന് സ്റ്റേഡിയങ്ങളും സ്ഥിതി ചെയ്യുന്നത്. 

ഏപ്രിൽ 22നാണ് രാജ്യത്തെ ഞെട്ടിച്ച ജമ്മു കശ്മീരിലെ ഭീകരാക്രമണം നടന്നത്. അക്രമത്തിൽ 27ലധികം നിരപരാധികളായ വിനോദസഞ്ചാരികൾ ആണ് കൊല്ലപ്പെട്ടത്. ട്രക്കിങിനായി പോയവർക്ക് നേരെയാണ് ആക്രമണം നടന്നത്. 2019ന് ശേഷം ജമ്മു കശ്മീരിൽ നടക്കുന്ന ഏറ്റവും വലിയ ഭീകരാക്രമണമാണ് പഹൽഗാമിൽ നടന്നത്. 

Report says Will Australian players be unavailable to play when the IPL returns