മാഡ്രിഡ്: റയൽ മാഡ്രിഡിന്റെ പുതിയ പരിശീലകനായി മുൻ സ്പാനിഷ് താരം സാബി അലോൺസയെ നിയമിച്ചു. മൂന്ന് വർഷത്തെ കരാറിലാണ് സാബി അലോൺസ റയലിന്റെ പരിശീലകനായി ചുമതലയേറ്റത്. ഈ സീസൺ അവസാനത്തോട് കൂടി കാർലോ ആൻസലോട്ടി റയലിന്റെ പരിശീലകസ്ഥാനത്തു നിന്നും പടിയിറങ്ങുമെന്ന് നേരത്തെ അറിയിച്ചിരുന്നു.

ഈ സാഹചര്യത്തിലാണ് സാബി അലോൺസ റയലിന്റെ പരിശീലക കുപ്പായം അണിഞ്ഞത്. ജർമൻ ക്ലബായ ബയർ ലെവർകൂസന്റെ പരിശീലകനായുള്ള യാത്രക്ക് വിരാമമിട്ടുകൊണ്ടാണ് മുൻ സ്പാനിഷ് താരം റയലിന്റെ പരിശീലകനാവുന്നത്. കഴിഞ്ഞ സീസണിൽ ബയർ ലെവർകൂസനെ ബുണ്ടസ് ലീഗ കിരീടത്തിലേക്ക് നയിക്കാൻ സാബി അലോൺസക്ക് സാധിച്ചിരുന്നു. 

ഈ സീസണിൽ ചാമ്പ്യൻസ് ലീഗ് കിരീടം റയലിന് നഷ്ടമായിരുന്നു. ക്വാർട്ടർ ഫൈനലിൽ ആഴ്സണലിനോട് പരാജയപ്പെട്ടാണ് റയൽ മാഡ്രിഡ് ചാമ്പ്യൻസ് ലീഗിൽ നിന്നും പുറത്തായത്. ഇപ്പോൾ ലാ ലിഗ കിരീടവും റയലിന് നഷ്ടമായിക്കൊണ്ടിരിക്കുകയാണ്. 

കഴിഞ്ഞ ദിവസം നടന്ന എൽ ക്ലാസിക്കോ പോരാട്ടത്തിൽ ബാഴ്സലോണക്കെതിരെ റയൽ മാഡ്രിഡ് പരാജയപ്പെട്ടിരുന്നു. റയലിൻറെ തട്ടകമായ സാൻറിയാഗോ ബെർണാബ്യൂവിൽ നടന്ന മത്സരത്തിൽ മൂന്നിനെതിരെ നാല് ഗോളിനായിരുന്നു ബാഴ്സയുടെ ജയം.

ഈ സീസണിൽ ഇത് നാലാം തവണയാണ് ബാഴ്സലോണ നിലവിലെ ചാമ്പ്യൻമാരായ റയൽ മാഡ്രിഡിനെ തോൽപിക്കുന്നത്. ലാ ലി​ഗയിൽ മൂന്ന് കളി ബാക്കി നിൽക്കേ രണ്ടാം സ്ഥാനത്തുള്ള റയൽ മാഡ്രിഡിനേക്കാൾ ഏഴ് പോയൻറ് മുന്നിലാണ് ബാഴ്സലോണ. അവശേഷിക്കുന്ന മൂന്ന് മത്സരങ്ങളിൽ ഒരു വിജയം നേടിയാൽ ബാഴ്സക്ക് കിരീടം സ്വന്തമാക്കാം. ഈ തോൽവിയോടെ റയലിൻറെ കിരീടമോഹങ്ങൾ ഏറക്കുറെ അവസാനിച്ചു.

Former Spanish player Xabi Alonso has been appointed as the new coach of Real Madrid