മാഡ്രിഡ്: ജർമൻ ഇതിഹാസം ടോണി ക്രൂസ് വീണ്ടും സ്പാനിഷ് വമ്പന്മാരായ റയൽ മാഡ്രിഡിന് വേണ്ടി ബൂട്ട് കെട്ടും. റയൽ മാഡ്രിഡ് ലെജൻഡ്‌സും ബൊറൂസിയ ഡോർട്ട്മുണ്ട് ലെജൻഡ്‌സും തമ്മിലുള്ള മത്സരത്തിലാണ് ടോണി ക്രൂസ് റയലിനായി വീണ്ടും കളിക്കാൻ എത്തുക. കൊറാസോൺ ക്ലാസിക് മാച്ചിന്റെ 12-ാം പതിപ്പിലാണ് ഇരു ടീമുകളും ഏറ്റുമുട്ടുന്നത്.

ജൂൺ ഏഴിന് സാൻ്റിയാഗോ ബെർണബ്യൂവിൽ വെച്ചാണ് മത്സരം നടക്കുക. തന്റെ സോഷ്യൽ മീഡിയ അക്കൗണ്ടിലൂടെയാണ് ക്രൂസ് ഇക്കാര്യം ഫുട്ബോൾ ലോകത്തിന് മുന്നിൽ അറിയിച്ചത്. റയലിന്റെ എക്കാലത്തെയും മികച്ച ഇതിഹാസ താരങ്ങളിൽ ഒരാളായ ടോണി ക്രൂസ് വീണ്ടും പഴയ തട്ടകത്തിലേക്ക് തിരിച്ചെത്തുന്നതിന്റെ ആവേശത്തിലാണ് ആരാധകർ. 

2024 യുവേഫ ചാമ്പ്യൻസ് ലീഗിന്റെ ഫൈനൽ പോരാട്ടത്തിലാണ് ക്രൂസ് റയലിനായി അവസാനമായി കളിച്ചത്. വെംബ്ലിയിൽ നടന്ന കലാശപ്പോരാട്ടത്തിൽ ബൊറൂസിയ ഡോർട്ട്മുണ്ടിനെ വീഴ്ത്തി റയൽ തങ്ങളുടെ ചരിത്രത്തിലെ പതിഞ്ചാം ചാമ്പ്യൻസ് ലീഗ് കിരീടം സ്വന്തമാക്കിയിരുന്നു.

മത്സരത്തിൽ എതിരില്ലാത്ത രണ്ട് ഗോളുകൾക്കായിരുന്നു റയലിന്റെ വിജയം. 2024 മെയ് 25ന് റയൽ ബെറ്റിസിനെതിരെയാണ് ലാ ലിഗയിൽ താരം അവസാനമായി സാന്റിയാഗോ ബെർണബ്യൂവിൽ  കളിച്ചത്. ആ മത്സരം ഗോൾ രഹിത സമനിലയിൽ പിരിയുകയായിരുന്നു. 

ഈ മത്സരത്തിൽ ടോണി ക്രൂസിന് പുറമെ ഐക്കർ കാസിയസ്, പെപ്പെ, മാർസെലോ എന്നീ താരങ്ങളും റയലിനായി കളിക്കും. മത്സരത്തിൽ നിന്നും ലഭിക്കുന്ന വരുമാനം സ്‌പാനിഷ് ക്ലബ്ബിന്റെ ഫൗണ്ടേഷൻ പിന്തുണയ്ക്കുന്ന സാമൂഹിക പദ്ധതികൾക്കായാണ് നൽകുക. 

Toni Kroos will play for Real Madrid again the football world is excited