തിരുവനന്തപുരം: നിയുക്ത കെ.പി.സി.സി അധ്യക്ഷൻ സണ്ണി ജോസഫ് ,  വര്‍ക്കിങ് പ്രസിഡന്റുമാരായ പി.സി വിഷ്ണുനാഥ് , എ.പി അനില്‍കുമാര്‍ , ഷാഫി പറമ്പില്‍, യു.ഡി.എഫ് കണ്‍വീനര്‍ അടൂര്‍ പ്രകാശ് എന്നിവര്‍ ഇന്ന് ചുമതലയേൽക്കും. രാവിലെ 9.30ന് കെ.പി.സി.സി ആസ്ഥാനത്ത് നടക്കുന്ന  ചടങ്ങ് എ.ഐ.സി.സി സംഘടനാ ചുമതലയുള്ള ജനറല്‍ സെക്രട്ടറി കെ.സി.വേണുഗോപാല്‍ എം.പി ഉദ്ഘാടനം ചെയ്യും. സ്ഥാനമൊഴിയുന്ന കെ.സുധാകരൻ യോഗത്തിൽ അധ്യക്ഷനാകും.

കേരളത്തിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി ദീപാദാസ് മുന്‍ഷി, പ്രതിപക്ഷ നേതാവ് വി.ഡി സതീശന്‍,  കോണ്‍ഗ്രസ് പ്രവര്‍ത്തക സമിതി അംഗങ്ങള്‍, എ.ഐ.സി.സി സെക്രട്ടറിമാര്‍, മുന്‍ കെ.പി.സി.സി പ്രസിഡന്റുമാര്‍, രാഷ്ട്രീയകാര്യ സമിതി അംഗങ്ങള്‍,കെ.പി.സി.സി ഭാരവാഹികള്‍, ഡി.സി.സി പ്രസിഡന്റുമാര്‍, എം.പിമാര്‍, എം.എല്‍.എമാര്‍ ചടങ്ങില്‍ പങ്കെടുക്കും.
രാവിലെ  നടക്കുന്ന സ്ഥാനാരോഹണ ചടങ്ങുകള്‍ക്ക് മുമ്പായി കോണ്‍ഗ്രസ് പ്രവര്‍ത്തക സമിതി അംഗം എ.കെ ആന്റണിയെ നിയുക്ത കെ.പി.സി.സി അധ്യക്ഷനും വര്‍ക്കിങ് പ്രഡിസന്റുമാരും സന്ദര്‍ശിക്കും.  ഇന്നലെ  സണ്ണി ജോസഫ് ,  പി.സി വിഷ്ണുനാഥ് , എ.പി അനില്‍കുമാര്‍, ഷാഫി പറമ്പില്‍ എന്നിവര്‍ കൊല്ലത്ത് ആര്‍.ശങ്കറിന്റെ സ്മൃതി മണ്ഡപത്തിലും പുഷ്പാര്‍ച്ചന നടത്തിയിരുന്നു.