മാഡ്രിഡ്: കഴിഞ്ഞ ദിവസം നടന്ന എൽ ക്ലാസിക്കോ പോരാട്ടത്തിൽ റയലിനെതിരെ ബാഴ്സലോണ ആവേശകരമായ   വിജയം സ്വന്തമാക്കിയിരിക്കുന്നു.റയലിൻറെ തട്ടകമായ സാൻറിയാഗോ ബെർണാബ്യൂവിൽ നടന്ന മത്സരത്തിൽ മൂന്നിനെതിരെ നാല് ഗോളിനായിരുന്നു ബാഴ്സയുടെ ജയം. മത്സരം പരാജയപ്പെട്ടെങ്കിലും റയലിന്റെ ഫ്രഞ്ച് സൂപ്പർ താരം കിലിയൻ എംബാപ്പെ ഹാട്രിക് നേടി മികച്ച പ്രകടനമാണ് പുറത്തെടുത്തത്.

ഈ ഹാട്രിക്കോടെ റയലിനൊപ്പം അരങ്ങേറ്റ സീസണിൽ ഏറ്റവും കൂടുതൽ ഗോളുകൾ നേടുന്ന താരമായി മാറാനും എംബാപ്പെക്ക് സാധിച്ചു. 39 ഗോളുകളാണ് ഈ സീസണിൽ ഫ്രഞ്ച് താരം നേടിയിട്ടുള്ളത്. 37 ​ഗോളുകൾ നേടിയ ഇവാൻ സൊമറാനോയെ മറികടന്നാണ് എംബാപ്പെ ഈ നേട്ടം കൈവരിച്ചത്. 1992-93 സീസണിൽ ആണ് താരം 37 ഗോളുകൾ സ്വന്തമാക്കിയത്. 

മത്സരത്തിൽ ആദ്യ 15 മിനിറ്റിനിടെ രണ്ട് ​ഗോൾ നേടിയ ശേഷമായിരുന്നു റയലിന്റെ പരാജയം. മത്സരത്തിന്റെ അഞ്ചാം മിനിറ്റിൽ ബാഴ്സ ഗോൾ കീപ്പർ ഷെസ്നിയുടെ ഫൗളിൽ നിന്ന് ലഭിച്ച പെനൽറ്റിയിലൂടെ എംബാപ്പെ റയലിനെ മുന്നിലെത്തിച്ചു. ഒമ്പത് മിനിറ്റുകൾക്ക് ശേഷം വിനീഷ്യസ് ജൂനിയറിന്റെ പാസ് ​ഗോളാക്കി മാറ്റി എംബാപ്പെ റയലിന് 2-0 ന്റെ ലീഡ് നൽകി. 

എന്നാൽ പത്തൊമ്പാതാം മിനിറ്റിൽ ബാഴ്സ ആദ്യ ​ഗോൾ നേടി. ഫെറാൻ ടോറസിൻറെ കോർണർ കിക്കിൽ നിന്ന് എറിക് ഗാർഷ്യയാണ് ബാഴ്സക്കായി ആദ്യ ​ഗോൾ നേടിയത്. പിന്നീട് ആക്രമിച്ച് കളിച്ച ബാഴ്സ 32ാം മിനിറ്റിൽ സമനില ഗോൾ നേടി. ഫെറാൻ ടോറസിന്റെ അസിസ്റ്റിൽ ലാമീൻ യമാലാണ് ബാഴ്സക്കായി സമനില നേടിയത്. രണ്ട് മിനിറ്റിനകം ബാഴ്സ ലീഡെടുത്തു. പെഡ്രിയുടെ പാസിൽ നിന്ന് റാഫീഞ്ഞയാണ് ബാഴ്സയുടെ മൂന്നാം ​ഗോൾ നേടിയത്. ഇടവേളക്ക് പിരിയുന്നതിനു മുമ്പ് 45ാം മിനിറ്റിൽ ബാഴ്സയെ 4-2 ന് മുന്നിലെത്തിച്ചു. ഉണർന്നു കളിച്ച റയൽ 70-ാം മിനിറ്റിൽ എംബാപ്പെയിലൂടെ ഒരു ഗോൾ കൂടി മടക്കിയെങ്കിലും മത്സരഫലം മാറ്റി മറിക്കാനായില്ല. 

ലാലി​ഗയിൽ മൂന്ന് കളി ബാക്കി നിൽക്കേ രണ്ടാം സ്ഥാനത്തുള്ള റയൽ മാഡ്രിഡിനേക്കാൾ ഏഴ് പോയൻറ് മുന്നിലാണ് ബാഴ്സലോണ. അവശേഷിക്കുന്ന മൂന്ന് മത്സരങ്ങളിൽ ഒരു വിജയം നേടിയാൽ ബാഴ്സക്ക് കിരീടം സ്വന്തമാക്കാം.

kylian mbappe break 33 year old record for real madrid in la liga