ദോഹ: സ്വകാര്യ മേഖലയിലെ കമ്പനികള്‍ക്ക് നിയമന പ്രക്രിയകള്‍ കാര്യക്ഷമമാക്കുന്നതിനായി ഡിജിറ്റല്‍ സംരംഭമായ 'ഔഖൂല്‍' പ്ലാറ്റ്‌ഫോം അവതരിപ്പിച്ച് ഖത്തര്‍ തൊഴില്‍ മന്ത്രാലയം. റിക്രൂട്ട്‌മെന്റ് സേവനങ്ങള്‍ ഡിജിറ്റലൈസ് ചെയ്യുന്നതിനും യുവ പ്രതിഭകളെ പ്രയോജനപ്പെടുത്തുന്നതിനുമുള്ള നീക്കങ്ങളുടെ ഭാഗമായാണ് ബിരുദധാരികളെ റിക്രൂട്ട് ചെയ്യാന്‍ ആഗ്രഹിക്കുന്ന സ്വകാര്യ മേഖലയിലെ കമ്പനികള്‍ക്കായി 'ഔഖൂല്‍' പ്ലാറ്റ്‌ഫോമിന്റെ ആദ്യ ഘട്ടം ആരംഭിച്ചത്.

ഗൂഗിള്‍ ക്ലൗഡ്, മനായ് ഇന്‍ഫോടെക് എന്നിവയുമായി സഹകരിച്ചാണ് 'ഔഖൂല്‍' പ്ലാറ്റ്‌ഫോം വികസിപ്പിച്ചെടുത്തത്. പ്രോഗ്രാമുകളിലും സംരംഭങ്ങളിലും കാര്യക്ഷമതയും വിശ്വാസ്യതയും വര്‍ദ്ധിപ്പിക്കുന്നതിന് അത്യാധുനിക സാങ്കേതികവിദ്യകള്‍ പ്രയോജനപ്പെടുത്തുന്നതിനുള്ള മന്ത്രാലയത്തിന്റെ നടപടികളുടെ ഭാഗമായാണിതെന്ന് അധികൃതര്‍ അറിയിച്ചു.

സ്വകാര്യമേഖലയിലാണ് പ്രധാനമായും 'ഔഖൂല്‍' ശ്രദ്ധ കേന്ദ്രീകരിക്കുക. യോഗ്യതയുള്ള പ്രവാസികള്‍ക്ക് ഉയര്‍ന്ന നിലവാരമുള്ള തൊഴിലവസരങ്ങള്‍ നല്‍കുകയാണ് ഇതിലൂടെ മന്ത്രാലയം ലക്ഷ്യമിടുന്നത്. ഒപ്പം പ്രാദേശിക തൊഴില്‍ വിപണിയുടെ മാറിക്കൊണ്ടിരിക്കുന്ന ആവശ്യങ്ങള്‍ നിറവേറ്റുന്നതും ലക്ഷ്യമാണ്.

'ഔഖൂല്‍' പ്ലാറ്റ്‌ഫോമില്‍ സ്വകാര്യ കമ്പനികള്‍ക്ക് ജോലി ഒഴിവുകള്‍ PDF ആയി അപ്‌ലോഡ് ചെയ്യാനോ പ്ലാറ്റ്‌ഫോമില്‍ നേരിട്ട് സൃഷ്ടിക്കാനോ കഴിയും. ആവശ്യാനുസരണം കൃത്യവും ഇഷ്ടാനുസൃതവുമായ ജോലി വിവരണങ്ങള്‍ തയ്യാറാക്കുന്നതിന് തൊഴിലുടമകളെ സഹായിക്കുന്ന എഐ ചാറ്റ്‌ബോട്ട് ആണ് അതിലെ പ്രധാന സവിശേഷത. 

സംഭാഷണ വര്‍ക്ക്ഫ്‌ലോയിലൂടെ ഉപയോക്താക്കളെ ഇടപഴകുന്നതിന് എഐ ചാറ്റ്‌ബോട്ട് വിപുലമായ ഭാഷാ പ്രോസസ്സിംഗ് ഉപയോഗിക്കുന്നു. തത്സമയ ഫീഡ്ബാക്കും ഉറപ്പാക്കുന്നു. ഈ പ്രവര്‍ത്തനം തൊഴിലുടമകളുടെ സമയം ലാഭിക്കുകയും ആവശ്യമായ ജീവനക്കാരെ ആകര്‍ഷിക്കുകയും ചെയ്യുന്നു. ഇത് റിക്രൂട്ട്‌മെന്റ് നടപടികള്‍ കൂടുതല്‍ കാര്യക്ഷമവും എളുപ്പത്തിലും ആക്കുന്നു.

ഖത്തറിലെ യൂണിവേഴ്‌സിറ്റി ബിരുദധാരികളെ സ്വകാര്യ മേഖലയിലെ തൊഴിലുകളുമായി ബന്ധിപ്പിക്കുന്ന ഈ സംവിധാനത്തെ നിര്‍ണായക നിമിഷം എന്നാണ് തൊഴില്‍ മന്ത്രാലയത്തിലെ അസിസ്റ്റന്റ് അണ്ടര്‍സെക്രട്ടറി ഹമദ് ദല്‍മൂക്ക് വിശേഷിപ്പിച്ചത്. 

സിഗ്‌നേച്ചറി ഓതറൈസേഷന്‍ കാര്‍ഡ് അല്ലെങ്കില്‍ പബ്ലിക് റിലേഷന്‍സ് ഓഫീസര്‍ (PRO) കാര്‍ഡ് ഉപയോഗിച്ച് തൗഖൂല്‍ നാഷണല്‍ ഓതന്റിക്കേഷന്‍ സിസ്റ്റം (NAS) വഴി സ്വകാര്യമേഖലയിലെ കമ്പനികള്‍ക്ക് പ്ലാറ്റ്‌ഫോം ആക്‌സസ് ചെയ്യാന്‍ കഴിയും. 

യൂണിവേഴ്‌സിറ്റി ബിരുദധാരികള്‍ക്ക് അവരുടെ പ്രൊഫൈലുകള്‍ രജിസ്റ്റര്‍ ചെയ്യാനും നിര്‍മ്മിക്കാനും അനുവദിക്കുന്ന ഇതിന്റെ രണ്ടാം ഘട്ടം ഉടന്‍ പ്രഖ്യാപിക്കും. പ്ലാറ്റ്‌ഫോമുമായി ഔപചാരിക ബന്ധങ്ങള്‍ സ്ഥാപിച്ച ഖത്തരി സര്‍വകലാശാലകളിലെ പൂര്‍വ്വ വിദ്യാര്‍ത്ഥികള്‍ക്ക് മാത്രമേ ഇതിന് കഴിയൂ. 

Website: https://www.mol.gov.qa/En/mediacenter/Pages/NewsDetails.aspx?itemid=441

Qatar launches phase one of Ouqoul platform to facilitate pvt-sector employment for graduates