റിയാദ്: സഊദി പ്രൊ ലീഗിൽ അൽ നസറിനെ വമ്പൻ ജയം. അൽ അഖ്തൂദ് എഫ്സിയെ  ഗോൾ മഴയിൽ മുക്കിയാണ് അൽ നസർ തകർപ്പൻ വിജയം സ്വന്തമാക്കിയത്. എതിരില്ലാത്ത ഒമ്പത് ഗോളുകൾക്കായിരുന്നു  സഊദി വമ്പന്മാരുടെ വിജയം. ക്ലബ്ബിന്റെ ചരിത്രത്തിലെ  ഏറ്റവും വലിയ വിജയമാണിത്. കഴിഞ്ഞ സീസണിൽ അബഹ എഫ്സിക്കെതിരെ നേടിയ 8-0ത്തിന്റെ വിജയമായിരുന്നു ഇതിനുമുമ്പ് അൽ നസറിന്റെ ഏറ്റവും വലിയ വിജയമായി രേഖപ്പെടുത്തിയിരുന്നത്. 

മത്സരത്തിൽ സൂപ്പർതാരം ക്രിസ്റ്റ്യാനോ റൊണാൾഡോ ഇല്ലാതെയായിരുന്നു അൽ നസർ കളത്തിൽ ഇറങ്ങിയിരുന്നത്. അൽ നസറിന് വേണ്ടി സാദിയോ മാനെ നാല് ഗോളുകൾ നേടി ടീമിന്റെ വിജയത്തിൽ നിർണായകമായ പങ്കാണ് വഹിച്ചത്. മത്സരത്തിൽ 45+6, 59, 64, 74 എന്നി മിനുറ്റുകൾ ആയിരുന്നു താരത്തിന്റെ ഗോളുകൾ പിറന്നത്.

ജോൺ ഡുറാൻ ഇരട്ട ഗോളുകളും നേടി തിളങ്ങി. മത്സരത്തിൽ 20, 52 മിനിറ്റുകളിലാണ് താരം ലക്ഷ്യം കണ്ടത്. അയ്മൻ യഹ്‌യ (16), മാഴ്സലോ ബ്രസോവിച്ച്(27), മുഹമ്മദ് മാരൻ (90+4) എന്നിവർ ഓരോ വീതം  നേടി ടീമിന്റെ ചരിത്ര വിജയത്തിൽ പങ്കാളികളായി. മത്സരത്തിന്റെ രണ്ടാം പകുതിയിൽ അൽ അഖ്തൂദ് താരം പൗളോ വിക്ടർ ചുവപ്പുകാർഡ് കണ്ടു പുറത്താവുകയും ചെയ്തിരുന്നു ഈ അവസരം കൃത്യമായി മുതലാക്കാൻ അൽ നസറിന് സാധിച്ചു.

മത്സരത്തിൽ 75 ശതമാനം ബോൾ പൊസഷൻ സ്വന്തമാക്കിയ അൽ നസർ 25 എതിരാളികളുടെ പോസ്റ്റിലേക്ക് അടിച്ചു കൂട്ടിയത്. ഇതിൽ 15 ഷോട്ടുകളും ലക്ഷ്യത്തിലേക്ക് ആയിരുന്നു. വിജയത്തോടെ പോയിന്റ് പട്ടികയിൽ മൂന്നാം സ്ഥാനത്തേക്ക് മുന്നേറാനും അൽ നസറിന് സാധിച്ചു. 31 മത്സരങ്ങളിൽ നിന്നും 19 വിജയവും ആറു വീതം തോൽവിയും സമനിലയുമായി 63 പോയിന്റാണ് അൽ നസറിന്റെ കൈവശമുള്ളത്. 74 പോയിന്റുമായി ഇത്തിഹാദ് ഒന്നാം സ്ഥാനത്തും 68 പോയിന്റോടെ അൽ ഹിലാൽ രണ്ടാം സ്ഥാനത്തുമാണ്.

Al Nassr Historical win Against Al Okhdood FC