കോയമ്പത്തൂര്‍: പൊള്ളാച്ചി കൂട്ടബലാത്സംഗ കേസില്‍ ഒന്‍പത് പ്രതികളും കുറ്റക്കാര്‍. ഒന്‍പത് പ്രതികള്‍ക്കും ജീവപര്യന്തം തടവ് ശിക്ഷ വിധിച്ച് കോയമ്പത്തൂര്‍ വനിതാക്കോടതി. പരാതിക്കാരായ എട്ട് സ്ത്രീകള്‍ക്കായി എണ്‍പത്തിയഞ്ച് ലക്ഷം രൂപ നല്‍കാനും കോടതി വിധിച്ചു. ബലാത്സംഗം അടക്കം ചുമത്തപ്പെട്ട എല്ലാ വകുപ്പുകളും സംശയാതീതമായി തെളിയിക്കപ്പെട്ടതായി കോടതി കണ്ടെത്തി. 

എന്‍. ശബരിരാജന്‍ (32), കെ. തിരുനാവുക്കരശ് (34), എം. സതീഷ് (33), ടി. വസന്തകുമാര്‍ (30), ആര്‍. മണി (32), പി. ബാബു (33), ടി. ഹരോണിമസ് പോള്‍ (32), കെ. അരുള്‍നാഥം (39), എം. അരുണ്‍കുമാര്‍ എന്നിവര്‍ കുറ്റക്കാരാണെന്ന് കോടതി കണ്ടെത്തിയിരുന്നു. ജഡ്ജി ആര്‍. നന്ദിനിദേവിയാണ് കേസില്‍ വിധി പറഞ്ഞത്.

തമിഴ്‌നാട്ടില്‍ ഏറെ കോളിളക്കമുണ്ടാക്കിയ കേസിലെ പ്രതികള്‍ ഇരുന്നൂറോളം സ്ത്രീകളെയാണ് പീഡിപ്പിച്ച് നഗ്‌നദൃശ്യങ്ങള്‍ പകര്‍ത്തിയത്. നാല്‍പ്പത്തിയെട്ട് സാക്ഷികളെ വിസ്തരിച്ച കോടതി 400 ലധികം ഡിജിറ്റല്‍ രേഖകളും പരിശോധിച്ചിരുന്നു. കേസ് അന്വേഷണത്തിലെ പൊലിസിന്റെ വീഴ്ചയെ തുടര്‍ന്ന് സിബിഐയാണ് തുടരന്വേഷണം നടത്തി പ്രതികളെ കുടുക്കിയത്.