വാഷിങ്ടണ്‍: ഇന്ത്യയും പാകിസ്ഥാനും തമ്മിലുള്ള സംഘര്‍ഷം ലഘൂകരിക്കാന്‍ മൂന്നാമതൊരു കക്ഷി ഇടപെട്ടില്ലെന്ന ഇന്ത്യയുടെ വാദം തള്ളി അമേരിക്കന്‍ പ്രസിഡന്റ് ഡോണാള്‍ഡ് ട്രംപ്. യുഎസ്-സഊദി ഇന്‍വെസ്റ്റ്‌മെന്റ് ഫോറത്തില്‍ സംസാരിക്കവെയായിരുന്നു ട്രംപിന്റെ പ്രതികരണം. വ്യാപാരം ആയുധമാക്കിയാണ് ഇന്ത്യയും പാകിസ്ഥാനും തമ്മിലുള്ള വെടിനിര്‍ത്തല്‍ കരാര്‍ കൊണ്ടുവന്നതെന്നും ട്രംപ് പറഞ്ഞു.

ഇന്ത്യ-പാക് വെടിനിര്‍ത്തല്‍ കരാര്‍ യാഥാര്‍ഥ്യമാക്കിയതിന് യുഎസ് വൈസ് പ്രസിഡന്റ് ജെഡി വാന്‍സിനേയും യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോയേയും ട്രംപ് അഭിനന്ദിച്ചു. ഷഹബാസ് ശരീഫും നരേന്ദ്ര മോദിയും ശക്തരായ നേതാക്കളാണെന്നും അദ്ദേപം പറഞ്ഞു. 

'ചെറിയ തോതില്‍ തുടങ്ങിയ പോരാട്ടം വലിയ യുദ്ധമായി മാറിക്കൊണ്ടിരിക്കുകയായിരുന്നു, ഇതിനിടയിലാണ് അമേരിക്കന്‍ ഇടപെടല്‍ ഉണ്ടായത്. ലക്ഷക്കണക്കിന് ആളുകള്‍ മരിച്ചേക്കാവുന്ന ഒരു യുദ്ധമാണ് ഒഴിവായത്' ട്രംപ് കൂട്ടിച്ചേര്‍ത്തു.

വെടിനിര്‍ത്തല്‍ കരാര്‍ യാഥാര്‍ഥ്യമാക്കാന്‍ യുഎസ് ഇടപെട്ടെന്നും വ്യാപാരം അവസാനിപ്പിക്കുമെന്ന കടുത്ത ഭീഷണിക്കു മുന്നില്‍ ഇന്ത്യയും പാകിസ്ഥാനും വഴങ്ങേണ്ടി വന്നു എന്നതടക്കമുള്ള ട്രംപിന്റെ അവകാശവാദങ്ങള്‍ കഴിഞ്ഞ ദിവസം ഇന്ത്യ തള്ളിയിരുന്നു. ഇരു രാജ്യങ്ങളും തമ്മിലുള്ള ചര്‍ച്ചകളുടെ ഫലമായാണ് വെടിനിര്‍ത്തല്‍ കരാര്‍ യാഥാര്‍ഥ്യമായതെന്നാണ് വിദേശകാര്യ മന്ത്രാലയ വക്താവ് രണ്‍ദീപ് ജയ്‌സ്‌വാള്‍ പറഞ്ഞിരുന്നു. 

കശ്മീര്‍ പ്രശ്‌നം പരിഹരിക്കാമായി ഇടപെടാമെന്ന ട്രംപിന്റെ വാഗ്ദാനവും ഇന്ത്യ തള്ളിയിരുന്നു. കശ്മീര്‍ ഇന്ത്യയും പാകിസ്ഥാനും തമ്മിലുള്ള കാര്യമാണെന്നും ഇതില്‍ മൂന്നാം കക്ഷിയുടെ ആവശ്യമില്ലെന്നും ഇന്ത്യ വ്യക്തമാക്കിയിരുന്നു.

Former US President Donald Trump refutes India's assertion of no external involvement in the ceasefire agreement, stating that the US played a key role in reducing tensions.