കൊല്ലം: ആശ്രാമം മൈതാനത്ത് സംസ്ഥാന സര്‍ക്കാരിന്റെ നാലാം വാര്‍ഷികത്തോട് അനുബന്ധിച്ച് നടക്കുന്ന 'എന്റെ കേരളം' പ്രദര്‍ശന വിപണനമേളയിലേക്ക് തിക്കിത്തിരക്കി കൊല്ലം കാര്‍. മേളയിലെ കാഴ്ചകള്‍ കാണാനും വിജ്ഞാനവും വിനോദവും ആസ്വദിക്കാനും സേവനങ്ങള്‍ അനുഭവിക്കാനുമെത്തുന്നവരുടെ തിരക്കിലാണ് മേള. കഴിഞ്ഞ നാലുദിവസങ്ങളിലായി ആയിരക്കണക്കിന് പേരാണ് മേള സന്ദര്‍ശിച്ചത്. വൈകുന്നേരത്തെ സാംസ്‌കാരിക പരിപാടികള്‍ ആസ്വദിക്കാനായി കുടുംബ സമേതമാണ് പലരും എത്തുന്നത്.

കുട്ടിക്കള്‍ക്കൊപ്പം കളിച്ചുനടക്കുന്ന റോബോ ഡോഗ്, സംശയങ്ങള്‍ക്ക് മറുപടി നല്‍കുന്ന എ.ഐ അധിഷ്ഠിത 'ഐറിസ്' തുടങ്ങി റോബോട്ടുകളെക്കൊണ്ടു സമ്പന്നമായ കേരള സ്റ്റാര്‍ട്ടപ്പ് മിഷന്റെ സ്റ്റാള്‍ കുട്ടികള്‍ക്കൊപ്പം മുതിര്‍ന്നവരുടേയും പ്രിയപ്പെട്ട ഇടമായി. വിവിധ വകുപ്പുകളുടെ വിസ്മയക്കാഴ്ചകള്‍ കണ്ടറിയുന്നവര്‍ക്ക് നിരവധി ഗെയിമുകളും സമ്മാനങ്ങളുമായി വിവിധ വകുപ്പുകള്‍ മത്സരിക്കുന്നു. അത്യാധുനിക ഓഗ്‌മെന്റഡ് റിയാലിറ്റി, വെര്‍ച്വല്‍ റിയാലിറ്റി തുടങ്ങിയ സാങ്കേതികവിദ്യകള്‍ അനുഭവിച്ച് അറിയാന്‍ കഴിയുന്ന വിധത്തിലാണ് മിക്ക സ്റ്റാളിന്റെയും സജ്ജീകരണം. 

വെര്‍ച്വല്‍ ഗെയിമുകളാണ് മറ്റൊരാകര്‍ഷണം. കായിക താല്‍പ്പര്യം വര്‍ധിപ്പിക്കുക എന്ന ലക്ഷ്യത്തോടെയുള്ള കേരള കായിക വികസന വകുപ്പ് സ്റ്റാളില്‍ ആരോഗ്യ ബോധവല്‍ക്കരണം, ചലഞ്ച് സോണ്‍, ഫണ്‍ സ്റ്റേഷന്‍, സ്‌ട്രെസ് റിലീഫ് സ്റ്റേഷന്‍ തുടങ്ങിയവയുണ്ട്. ഒട്ടനവധി മത്സരങ്ങളും ഒരുക്കിയിട്ടുണ്ട്.