സ്റ്റോക്ക്ഹോം: ചാരവൃത്തി ആരോപിച്ച് സ്വീഡിഷ് സുരക്ഷാ വിഭാഗം (SAPO) കസ്റ്റഡിയിലെടുത്ത ഉന്നത നയതന്ത്രജ്ഞനെ മരിച്ച നിലയിൽ കണ്ടെത്തി. ഞായറാഴ്ച മുതൽ ബുധനാഴ്ച വരെ കസ്റ്റഡിയിൽ വച്ചിരുന്ന 50-നോടടുത്ത് പ്രായമുള്ള  നയതന്ത്രജ്ഞന്റെ മരണം അദ്ദേഹത്തിന്റെ അഭിഭാഷകൻ ആന്റൺ സ്ട്രാൻഡ് വെള്ളിയാഴ്ച സ്ഥിരീകരിച്ചു. മരണകാരണം വ്യക്തമല്ലാത്തതിനാൽ പൊലീസ് അന്വേഷണം ആരംഭിച്ചെങ്കിലും, പ്രാഥമിക നിഗമനത്തിൽ കുറ്റകൃത്യത്തിന്റെ ലക്ഷണങ്ങളില്ലെന്നാണ് റിപ്പോർട്ട്.

ദീർഘകാലം വിദേശത്ത് ജോലി ചെയ്ത ശേഷം അടുത്തിടെ മധ്യ സ്റ്റോക്ക്ഹോമിലെ വീട്ടിലേക്ക് മടങ്ങിയെത്തിയ നയതന്ത്രജ്ഞൻ, കസ്റ്റഡിയിൽ നിന്ന് മോചിതനായ ശേഷം വൈദ്യസഹായം തേടിയിരുന്നതായി അഭിഭാഷകൻ ആന്റൺ സ്ട്രാൻഡ് വെളിപ്പെടുത്തി. അറസ്റ്റിനിടെ അമിത ബലപ്രയോഗം നടന്നതായി ആരോപിച്ച് നയതന്ത്രജ്ഞൻ പൊലീസിനെതിരെ പരാതി നൽകിയിരുന്നു. എന്നാൽ, അറസ്റ്റ് സമാധാനപരമായിരുന്നുവെന്ന് SAPO അവകാശപ്പെടുന്നു. “അറസ്റ്റിനിടെയുണ്ടായ ദുരുപയോഗം സംബന്ധിച്ച പരാതി പ്രത്യേക അന്വേഷണ യൂണിറ്റിൽ എത്തിയിട്ടുണ്ട്. അന്വേഷണം ആരംഭിച്ചു,” സ്ട്രാൻഡ് ബിബിസിയോട് പറഞ്ഞു.

സ്വീഡന്റെ ദേശീയ സുരക്ഷാ ഉപദേഷ്ടാവ് തോബിയാസ് തൈബർഗ് കഴിഞ്ഞയാഴ്ച സ്ഥാനമേറ്റ ശേഷം മണിക്കൂറുകൾക്കകം രാജിവച്ച സംഭവവുമായി ഈ കേസിന് ബന്ധമുണ്ടോയെന്ന് SAPO അന്വേഷിക്കുന്നുണ്ട്. ഡേറ്റിംഗ് ആപ്പായ ഗ്രിൻഡറിൽ നിന്നുള്ള തൈബർഗിന്റെ സ്വകാര്യ ചിത്രങ്ങൾ അദ്ദേഹത്തിന്റെ രാജിക്ക് തൊട്ടുമുമ്പ് സർക്കാരിന് അജ്ഞാതമായി ചോർന്നിരുന്നു. ചാരവൃത്തി ആരോപണവുമായി ബന്ധപ്പെട്ട അന്വേഷണം ഇനിയും പൂർത്തിയായിട്ടില്ലെന്ന് പ്രോസിക്യൂട്ടർ പെർ ലിൻഡ്ക്വിസ്റ്റ് വ്യക്തമാക്കി.

സ്വീഡൻ വിദേശകാര്യ മന്ത്രാലയം മരണം സ്ഥിരീകരിച്ചെങ്കിലും, കുടുംബത്തിന്റെ വികാരങ്ങൾ മാനിച്ച് കൂടുതൽ വിവരങ്ങൾ നൽകാൻ വിസമ്മതിച്ചു. 

“വളരെ ഖേദകരം” എന്നാണ് മരണത്തെക്കുറിച്ച് പ്രോസിക്യൂട്ടർ ലിൻഡ്ക്വിസ്റ്റ് പ്രതികരിച്ചത്. നയതന്ത്രജ്ഞന്റെ മരണവുമായി ബന്ധപ്പെട്ട കൂടുതൽ വിവരങ്ങൾ ലഭ്യമല്ലാത്തതിനാൽ, മരണകാരണം വ്യക്തമാക്കാൻ പൊലീസ് അന്വേഷണം തുടരുകയാണ്.