മുംബൈ: ഇന്ത്യയിൽ നിന്ന് യുഎസിലേക്ക് കയറ്റുമതി ചെയ്ത 15 മാമ്പഴ ബാച്ചുകൾ, രേഖകളിലെ പിഴവ് കാരണം യുഎസ് അധികൃതർ തടഞ്ഞു. റേഡിയേഷൻ പ്രക്രിയയുമായി ബന്ധപ്പെട്ട രേഖകളിലെ പൊരുത്തക്കേടാണ് നടപടിക്ക് കാരണമായത്. കയറ്റുമതിക്കാരോട് ചരക്ക് നശിപ്പിക്കുകയോ ഇന്ത്യയിലേക്ക് തിരികെ അയക്കുകയോ ചെയ്യാൻ ആവശ്യപ്പെട്ടെങ്കിലും, ഉയർന്ന ചെലവും മാമ്പഴത്തിന്റെ കേടുവരാനുള്ള സാധ്യതയും കണക്കിലെടുത്ത് ചരക്ക് ഉപേക്ഷിക്കാൻ തീരുമാനിച്ചു.

മെയ് 8, 9 തീയതികളിൽ മുംബൈയിൽ റേഡിയേഷൻ പരിശോധനയ്ക്ക് വിധേയമാക്കിയ മാമ്പഴങ്ങൾ, ലോസ് ഏഞ്ചൽസ്, സാൻ ഫ്രാൻസിസ്കോ, അറ്റ്ലാന്റ എന്നിവിടങ്ങളിലെ വിമാനത്താവളങ്ങളിൽ എത്തിയപ്പോൾ തിരസ്കരിക്കപ്പെടുകയാണ് ഉണ്ടായത്. കീടനാശിനിക്കും ഷെൽഫ് ആയുസ്സ് വർധിപ്പിക്കുന്നതിനുമായി നടത്തുന്ന നിർബന്ധിത റേഡിയേഷൻ പ്രക്രിയയുടെ രേഖകളിൽ വന്ന പിഴവാണ് ഇതിന് കാരണമായതെന്ന് യുഎസ് അധികൃതർ വ്യക്തമാക്കി.

നവി മുംബൈയിലെ യുഎസ്ഡിഎ അംഗീകൃത കേന്ദ്രത്തിൽ യുഎസ് കൃഷി വകുപ്പ് (യുഎസ്ഡിഎ) ഉദ്യോഗസ്ഥന്റെ മേൽനോട്ടത്തിലാണ് റേഡിയേഷൻ നടത്തിയത്. എന്നാൽ, നിർബന്ധിത രേഖയായ പിപിക്യു203 ഫോം തെറ്റായി പൂർത്തീകരിച്ചതിനാൽ യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ കയറ്റുമതിക്ക് അനുമതി നിഷേധിച്ചു. നിരസിക്കൽ മൂലം കയറ്റുമതിക്കാർക്ക് ഏകദേശം 5 ലക്ഷം ഡോളറിന്റെ (41 കോടി രൂപയോളം) നഷ്ടമുണ്ടാകുമെന്നാണ് കണക്കാക്കപ്പെടുന്നത്. ഇന്ത്യയിലെ ഏറ്റവും വലിയ മാമ്പഴ കയറ്റുമതി വിപണിയാണ് യുഎസ്.

കാർഷിക, സംസ്കരിച്ച ഭക്ഷ്യ ഉൽപ്പന്ന അതോറിറ്റി (APEDA) ചെയർമാന്റെ ഓഫീസ് സംഭവത്തിൽ പ്രതികരിച്ചു. മഹാരാഷ്ട്ര സ്റ്റേറ്റ് അഗ്രികൾച്ചറൽ മാർക്കറ്റിംഗ് ബോർഡിന്റെ (MSAMB) വാഷിയിലെ ഓഫീസുമായി ബന്ധപ്പെട്ട വിഷയമാണിതെന്നും കൂടുതൽ വിവരങ്ങൾ അവരിൽ  തേടാവുന്നതാണെന്നും അറിയിച്ചു. ഈ സംഭവം കയറ്റുമതി രംഗത്ത് കൂടുതൽ ജാഗ്രത പുലർത്തേണ്ടതിന്റെ ആവശ്യകത വ്യക്തമാക്കുന്നു.