ന്യൂഡല്‍ഹി: ഓപറേഷന്‍ സിന്ദൂറിന്റെ പുതിയ വീഡിയോ പുറത്തു വിട്ട് കരസേന. ഓപറേഷന്‍ സിന്ദൂറിന്റെ ഭാഗമായി പാകിസ്ഥാനിലെയും പാക് അധിനിവേശ പ്രദേശങ്ങളിലെയും സൈനിക, ഭീകര കേന്ദ്രങ്ങള്‍ക്ക് നേരെ ആക്രമണം നടത്തുന്നതിന്റെ ദൃശ്യങ്ങളാണ് സേന പുറത്തുവിട്ടിരിക്കുന്നത്. നീതി നടപ്പാക്കി എന്ന അടിക്കുറിപ്പോടെയാണ് കരസേനയുടെ വെസ്റ്റേണ്‍ കമാന്‍ഡ് എക്‌സിലൂടെ വിഡിയോ പുറത്തുവിട്ടിരിക്കുന്നത്. 'ആസൂത്രണം ചെയ്തു, പരിശീലിപ്പിച്ചു, നടപ്പിലാക്കി. നീതി നടപ്പിലായി' കരസേന എക്‌സില്‍ കുറിച്ചു.

മെയ് ഒമ്പതാം തീയതി മുതല്‍ നടത്തിയ ആക്രമണങ്ങളുടെ ദൃശ്യങ്ങളാണ് സേന പങ്കുവെച്ചിരിക്കുന്നത്. പ്രതികാരമല്ലെന്നും കനത്ത തിരിച്ചടിയിലൂടെ ശത്രുക്കള്‍ക്ക് കൃത്യമായ മറുപടി നല്‍കുകയാണ് ലക്ഷ്യമിട്ടതെന്നും വിഡിയോയില്‍ സൈനികര്‍ വ്യക്തമാക്കുന്നു.

പാക് കേന്ദ്രങ്ങള്‍ തകര്‍ക്കുന്നതിന്റെ ദൃശ്യങ്ങള്‍ കരസേന മുമ്പും പുറത്തുവിട്ടിരുന്നു. എന്നാല്‍, ഇത്രയും വ്യക്തമായ ആക്രമണ ദൃശ്യങ്ങള്‍ സേന പുറത്തുവിടുന്നത് ആദ്യമായാണ്.

ശനിയാഴ്ച വെസ്റ്റേണ്‍ കമാന്‍ഡിന്റെ കീഴിലുള്ള പ്രദേശങ്ങള്‍ സന്ദര്‍ശിച്ച കമാന്‍ഡര്‍ ലഫ്റ്റനന്റ് ജനറല്‍ മനോജ് കുമാര്‍ കഠ്യാര്‍ സൈനികര്‍ക്ക് മനോവീര്യം പകര്‍ന്നിരുന്നു. കൂടാതെ, പ്രദേശത്ത് കൂടുതല്‍ ജാഗ്രത പുലര്‍ത്തണമെന്ന് കമാന്‍ഡര്‍ നിര്‍ദേശം നല്‍കുകയും ചെയ്തു.

#StrongAndCapable#OpSindoor

Planned, trained & executed.

Justice served.@adgpi@prodefencechan1 pic.twitter.com/Hx42p0nnon

— Western Command - Indian Army (@westerncomd_IA) May 18, 2025