വാഷിംങ്ടണ്‍: യു.എസിന്റെ തീരദേശ സംസ്ഥാനങ്ങളില്‍ ആഞ്ഞടിച്ച്  കൊടുങ്കാറ്റ്. ഇതേ തുടര്‍ന്ന് കുറഞ്ഞത് 27 പേര്‍ക്ക് ജീവന്‍ നഷ്ടപ്പെട്ടതായി റിപ്പോര്‍ട്ട്.  കെന്റക്കിയിലാണ് 18 പേര്‍ മരിച്ചത്. ഇവിടെ 10 പേരെ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചിട്ടുണ്ട്.

ശക്തമായ കാറ്റ് കെന്റക്കിയില്‍ വ്യാപക നാശമാണ് വിതച്ചിരിക്കുന്നത്.  നൂറു കണക്കിന് വീടുകള്‍ക്ക് കേടുപാടുകള്‍ സംഭവിച്ചതായും വാഹനങ്ങള്‍ നശിച്ചതായും റിപ്പോര്‍ട്ടുകള്‍ പറയുന്നു.
 
മിസോറിയില്‍ അഞ്ച് പേര്‍ മരിച്ചതായും 38 പേര്‍ക്ക് പരുക്കേറ്റതായും റിപ്പോര്‍ട്ടുകള്‍ പറയുന്നു. 5000ത്തിലധികം വീടുകള്‍ കൊടുങ്കാറ്റില്‍ തകര്‍ന്നതായും സെന്റ് ലൂയിസ് മേയര്‍ കാര സ്‌പെന്‍സര്‍ സ്ഥിരീകരിച്ചു. 

സംസ്ഥാന പാതകള്‍ അടച്ചിട്ടിരിക്കുകയാണ്. ഇവ തുറക്കാന്‍ ദിവസങ്ങളെടുത്തേക്കുമെന്നാണ് റിപ്പോര്‍ട്ടുകള്‍ പറയുന്നത്. മരണസംഖ്യ ഇനിയും ഉയര്‍ന്നേക്കാമെന്നും അധികൃതര്‍ ചൂണ്ടിക്കാട്ടുന്നു.  സെന്റ് ലൂയിസിന്റെ പ്രാന്തപ്രദേശമായ ക്ലേറ്റണില്‍ വീണ്ടും ചുഴലിക്കാറ്റ് ആഞ്ഞടിക്കാന്‍ സാധ്യതയുണ്ടെന്ന് റഡാര്‍ ഡാറ്റ സൂചിപ്പിക്കുന്നു.

ഓരോ വര്‍ഷവും യു.എസിലുടനീളം 1,200ത്തോളം കൊടുങ്കാറ്റുകള്‍ ഉണ്ടാകാറുണ്ടെന്നാണ് കണക്കുകള്‍ പറയുന്നത്.