ദുബൈ: യുഎഇ സര്‍ക്കാരിനു മുന്നില്‍ ഓപ്പറേഷന്‍ സിന്ദൂര്‍ വിശദീകരിച്ച് ഇന്ത്യന്‍ പ്രതിനിധി സംഘം. ഡോ. ശ്രീകാന്ത് ഷിന്‍ഡെയുടെ നേതൃത്വത്തിലുള്ള സംഘമാണ് യുഎഇയില്‍ ഓപ്പറേഷന്‍ സിന്ദൂറിനെക്കുറിച്ച് വിശദീകരിക്കാനായി എത്തിയിരിക്കുന്നത്.

ഇന്നലെയാണ് പാര്‍ലമെന്റ് അംഗം ഡോ. ശ്രീകാന്ത് ഷിന്‍ഡെയുടെ നേതൃത്വത്തിലുള്ള മറ്റ് പാര്‍ലമെന്റ് അംഗങ്ങളുടെയും രാഷ്ട്രീയക്കാരുടെയും പ്രതിനിധി സംഘം അബൂദബിയിലെത്തിയത്.

ഫെഡറല്‍ നാഷണല്‍ കൗണ്‍സില്‍ അംഗം അഹമ്മദ് മിര്‍ ഖൂരി, അംബാസഡര്‍ സഞ്ജയ് സുധീര്‍ എന്നിവര്‍ ചേര്‍ന്ന് ഇന്ത്യന്‍ പ്രതിനിധി സംഘത്തെ സ്വീകരിച്ചു.

മനന്‍ കുമാര്‍ മിശ്ര, സസ്മിത് പത്ര, ഇ.ടി മുഹമ്മദ് ബഷീര്‍, എസ് എസ് അലുവാലിയ, അതുല്‍ ഗാര്‍ഗ്, ബന്‍സുരി സ്വരാജ്, അംബാസഡര്‍ സുജന്‍ ആര്‍ ചിനോയ് എന്നിവരാണ് സംഘത്തിലുള്ളത്.

വിവിധ രാഷ്ട്രീയ പാര്‍ട്ടികളില്‍ നിന്നുള്ള 40ലധികം പാര്‍ലമെന്റ് അംഗങ്ങള്‍ (എംപിമാര്‍) ഉള്‍പ്പെടുന്ന ഏഴ് പ്രതിനിധി സംഘങ്ങള്‍ ഏഷ്യ, ആഫ്രിക്ക, യൂറോപ്പ്, അമേരിക്ക എന്നിവിടങ്ങളിലായി ഏകദേശം 33 രാജ്യങ്ങളിലേക്ക് തിരിച്ചിട്ടുണ്ട്.

2025 ഏപ്രിലില്‍ 26 പേരുടെ മരണത്തിനിടയാക്കിയ പഹല്‍ഗാം ഭീകരാക്രമണത്തിന്റെ പശ്ചാത്തലത്തില്‍ ഇന്ത്യന്‍ സര്‍ക്കാര്‍ ആരംഭിച്ച ഏകോപിത നയതന്ത്രത്തിന്റെ ഭാഗമാണ് കേന്ദ്രം നിയമിച്ച സര്‍വകക്ഷി പ്രതിനിധി സംഘങ്ങള്‍.

Indian delegation has formally briefed the UAE government on Operation Sindoor, outlining strategic goals and bilateral cooperation efforts.