ന്യൂഡല്‍ഹി: മലപ്പുറം കൂരിയാട് നിര്‍മാണത്തിലുള്ള ആറുവരി ദേശീയപാത തകര്‍ന്ന സംഭവത്തില്‍ നിര്‍മാണ കരാറുകാരായ കെ.എന്‍.ആര്‍ കണ്‍സ്ട്രക്ഷന്‍സ് കമ്പനിയെ ഡീബാര്‍ ചെയ്ത് കേന്ദ്രം. കേന്ദ്ര ഉപരിതല മന്ത്രാലയത്തിന്റേതാണ് നടപടി. കണ്‍സള്‍ട്ടന്റായ ഹൈവേ എഞ്ചിനീയറിങ്ങിനും വിലക്കുണ്ട്. ഇരു കമ്പനികള്‍ക്കും തുടര്‍ കരാറുകളില്‍ പങ്കെടുക്കാനാവില്ല.  രണ്ട് കമ്പനികളിലെയും രണ്ട് ഉദ്യോഗസ്ഥരെ സസ്‌പെന്‍ഡ് ചെയ്യുകയും ചെയ്തു.

മെയ് 19നാണ് മലപ്പുറം കൂരിയാട് വയലില്‍ മണ്ണിട്ടുയര്‍ത്തി നിര്‍മിച്ച ആറുവരിപ്പാതയും സര്‍വിസ് റോഡും തകര്‍ന്നത്. അപകടത്തില്‍ സര്‍വിസ് റോഡിലൂടെ സഞ്ചരിച്ച രണ്ട് കാറുകള്‍ തകരുകയും നാല് പേര്‍ക്ക് പരുക്കേല്‍ക്കുകയും ചെയ്തിരുന്നു. വയല്‍ നികത്തി നിര്‍മിച്ച സര്‍വിസ് റോഡാണ് ആദ്യം ഇടിഞ്ഞത്. പിന്നാലെ, ഏറെ ഉയരത്തില്‍ നിര്‍മിച്ച ദേശീയപാതയുടെ മതിലും സര്‍വിസ് റോഡിലേക്ക് നിലംപൊത്തി. കോഴിക്കോട് നിന്ന് തൃശൂര്‍ ഭാഗത്തേക്ക് വരുന്നിടത്താണ് റോഡ് ഇടിഞ്ഞത്. ദേശീയപാത നിര്‍മാണത്തിന് ഉപയോഗിക്കുന്ന ജെ.സി.ബിയും കുഴിയിലേക്ക് വീണു. വാഹനങ്ങളുടെ മുകളിലേക്കാണ് മണ്ണിടിഞ്ഞ് വീണതെങ്കിലും ആളപായമുണ്ടായില്ല. 

സംഭവത്തിന് പിന്നാലെ നിര്‍മാണത്തില്‍ അപാകതയുണ്ടെന്ന് വ്യാപക വിമര്‍ശനമുയര്‍ന്നു. രാഷ്ട്രീയ പാര്‍ട്ടികളും നാട്ടുകാരും പ്രതിഷേധവുമായി രംഗത്തെത്തി. ഇതിന് പിന്നാലെ കേന്ദ്രത്തിന്റെ രണ്ടംഗ വിദഗ്ധ സമിതി കൂരിയാട് സന്ദര്‍ശിക്കുകയും ചെയ്തിരുന്നു.