മക്ക: ഹജ്ജ് കർമത്തിലെ ഏറ്റവും പ്രധാനപ്പെട്ട ചടങ്ങായ അറഫ സംഗമത്തിൽ ഇത്തവണ ഖുതുബ നിർവഹിക്കുക ശൈഖ് സ്വാലിഹ് ബിൻ ഹുമൈദ്. ലോക മുസ്‌ലിംകളുടെ പരിച്ഛേദമായി പങ്കെടുക്കുന്ന ഇരുപതു ലക്ഷത്തിലേറെ വരുന്ന തീർഥാടകരെയും ലോകത്തെ 150 കോടിയിലേറെ വരുന്ന മുസ്‌ലിംകളെയും അഭിസംബോധന ചെയ്തു‌ള്ളതാണ് അറഫ ഖുതുബ.

അറഫ സംഗമത്തിനിടെ ഉദ്ബോധന പ്രസംഗം നിർവഹിക്കാൻ ശൈഖ് ഡോ. സ്വാലിഹ് ബിൻ അബ്ദുല്ല ബിൻ ഹുമൈദിനെ ചുമതലപ്പെടുത്താൻ സഊദി ഭരണാധികാരി സൽമാൻ ബിൻ അബ്ദുൽ അസീസ് രാജാവ് അനുമതി നൽകിയതായി ഹറംമതകാര്യ വകുപ്പ് അറിയിച്ചു. പ്രവാചക മാതൃക പിന്തുടർന്നുള്ള അറഫ പ്രസംഗത്തിലെ സന്ദേശങ്ങൾക്ക് മുസ്‌ലിം ലോകം വലിയ പ്രാധാന്യമാണ് നൽകുന്നത്.

ദുൽഹിജ്ജ മാസപ്പിറവി നിരീഷിക്കാൻ സഊദി സുപ്രീം കോടതി ആഹ്വാനം ചെയ്തിട്ടുണ്ട്. അടുത്ത ചൊവ്വാഴ്ച വൈകുന്നേരം ദുല്‍ഹിജ്ജ മാസപ്പിറവി നിരീക്ഷിക്കണമെന്നാണ് ആഹ്വാനം. ഉമ്മുല്‍ ഖുറാ കലണ്ടര്‍ പ്രകാരം സഊദിയിൽ അന്ന് ദുല്‍ഖഅ്ദ 29 ആണ്. മാസപ്പിറവി ദര്‍ശിക്കുന്നവര്‍ തൊട്ടടുത്ത കോടതിയെ അറിയിക്കണമെന്നും മാസപ്പിറവി ദര്‍ശിക്കാന്‍ സാധിക്കുന്നവര്‍ ഇക്കാര്യം ഗൗരവത്തിലെടുക്കണമെന്നും അതത് പ്രദേശങ്ങളിലെ മാസപ്പിറവി നിരീക്ഷണ സമിതികളുമായി സഹകരിക്കണമെന്നും സുപ്രീം കോടതി ആവശ്യപ്പെട്ടു.