മക്ക: വിശുദ്ധ ഹജ്ജ് കർമ്മത്തിൻ്റെ ഭാഗമായി അറഫയിൽ ഒരുമിച്ച് കൂടിയ  ലോകമെമ്പാടുമുള്ള ദശലക്ഷക്കണക്കിന് വിശ്വാസികളെ അഭിസംബോധന ചെയ്യുക മസ്ജിദുൽ ഹറമിൻ്റെ മേധാവി ഇമാം ഷെയ്ഖ് സാലിഹ് ബിൻ ഹുമൈദ്.  ഹറമിലെ ഇമാമും ഖത്തീബുമായ ഷെയ്ഖ് ഡോ. സാലിഹ് ബിൻ ഹുമൈദിനെ ഈ വർഷത്തെ ഹജ്ജിനുള്ള അറഫ പ്രഭാഷണത്തിന് വിശുദ്ധ പള്ളികളുടെ സൂക്ഷിപ്പുകാരൻ സൽമാൻ ബിൻ അബ്ദുൽ അസീസ് രാജാവ്  അംഗീകാരം നൽകിയതായി സൗദി പ്രസ് ഏജൻസി റിപ്പോർട്ട് ചെയ്തു. ദുൽ ഹിജ്ജ 9 ന് ദുഹ്‌ർ, അസർ നമസ്കാരങ്ങൾ ഒരുമിച്ച് നടത്തുന്നതിന് മുമ്പ് അറഫ പർവതത്തിലെ മസ്ജിദ് അൽ-നിമ്രയിൽ നിന്നാണ് പ്രഭാഷണം നടത്തുന്നത്.  

നിലവിൽ ഹറമിലെ ഒമ്പത് ഇമാമുമാരിൽ ഒരാളാണ് ഷെയ്ഖ് ഡോ. സാലിഹ് ബിൻ ഹുമൈദ്. 1993 മുതൽ സൗദി മജ്‌ലിസ് അൽ ശൂറയിൽ (സൗദി അറേബ്യയിലെ കൺസൾട്ടേറ്റീവ് അസംബ്ലി) അംഗവുമാണ്. 2002 ഫെബ്രുവരി മുതൽ 2009 ഫെബ്രുവരി വരെ മജ്‌ലിസ് അൽ ശൂറയുടെ സ്പീക്കറുമായും പ്രവർത്തിച്ചു.

 മക്കയിലെ അറബിക് ഭാഷാ അക്കാദമിയിലെ അംഗവും ജിദ്ദയിലെ ഇന്റർനാഷണൽ ഇസ്ലാമിക് ഫിഖ്ഹ് അക്കാദമിയുടെ പ്രസിഡന്റുമാണ്. സൗദി അറേബ്യ മുൻ ചീഫ് ജസ്റ്റിസ് ഇബ്നു ഹുമൈദിന്റെ മകനാണ് അദ്ദേഹം.

സഊദിയിൽ ഇന്നലെ മാസപ്പിറവി ദൃശ്യമായിരുന്നു. ഇതുപ്രകാരം അറഫ ദിനം ജൂൺ അഞ്ചിന് വ്യാഴാഴ്ചയും ബലിപെരുന്നാൾ വെള്ളിയാഴ്ചയും ആയിരിക്കും. വിവിധ ഭാഗങ്ങളിൽ മാസപ്പിറവി ദൃശ്യമായതിനെ തുടർന്നാണ് തീരുമാനം പ്രഖ്യാപിച്ചത്. 

ഇതോടെ ഹജ്ജിനുള്ള അവസാന ഘട്ട ഒരുക്കങ്ങളിലേക്ക് തീര്‍ത്ഥാടകരും അധികൃതരും കടന്നു. ഹജ്ജ് ചടങ്ങുകള്‍ക്ക് ജൂൺ നാലിനാണു (ദുല്‍ഹിജ്ജ 8) തുടക്കം കുറിക്കുക. ദുല്‍ഹജ്ജ് ഏഴിന് വൈകീട്ടോടെ തന്നെ ഹാജിമാര്‍ മക്കയില്‍ നിന്നും നീങ്ങി തുടങ്ങും ജൂൺ 09 (ദുല്‍ഹജ്ജ് 13ന്) ചടങ്ങുകള്‍ അവസാനിക്കും.

Saudi Arabia: Sheikh Saleh bin Humaid to deliver Arafah sermon