തിരുവനന്തപുരം: മംഗളൂരു-തിരുവനന്തപുരം വന്ദേഭാരതിൽ യാത്രക്കാർക്ക് കാലാവധി കഴിഞ്ഞ ശീതള പാനീയം നൽകിയെന്ന് പരാതിയിൽ മനുഷ്യാവകാശ കമ്മീഷൻ സ്വമേധയാ കേസ് രേഖപ്പെടുത്തി. സംഭവത്തിൽ പാലക്കാട് റെയിൽവേ ഡിവിഷണൽ മാനേജർക്ക് നോട്ടീസ് അയച്ചു. പരാതി പരിശോധിച്ച് 15 ദിവസത്തിനുള്ളിൽ റിപ്പോർട്ട് സമർപ്പിക്കണം എന്നാണ് കമ്മീഷൻ ജുഡീഷ്യൽ അംഗം കെ ബൈജുനാഥ് ആവശ്യപ്പെട്ടത്. 

 2024 സെപ്റ്റംബർ 25ന് നിർമ്മിച്ച 2025 മാർച്ച് 24ന് കാലാവധി തീർന്ന ശീതളപാനീയമായിരുന്നു യാത്രക്കാർക്ക് നൽകിയിരുന്നത്. പരാതി നൽകിയത് കാറ്ററിങ് ജീവനക്കാർ നിസ്സാരവൽക്കരിച്ചു എന്നാണ് യാത്രക്കാർ പരാതിപ്പെട്ടത്. ജൂൺ 26ന് കോഴിക്കോട് ഗവൺമെന്റ് ഗസ്റ്റ് ഹൗസിൽ നടക്കുന്ന സിറ്റിങ്ങിൽ ആയിരിക്കും കേസ് പരിഗണിക്കുക..

ഭക്ഷണത്തിനു വരെ നല്ലൊരു തുക മുടക്കി യാത്ര ചെയ്യുന്ന ആളുകളോട് റെയിൽവേ ഇത്തരത്തിൽ പെരുമാറുന്നത് വലിയ ജനരോഷത്തിന് കാരണമായിട്ടുണ്ട്. ഇതിനുമുമ്പ് തന്നെ വന്ദേ ഭാരത് ട്രെയിനിനുവേണ്ടി ഭക്ഷണം ഉണ്ടാക്കുന്ന കൊച്ചിയിലെ സ്ഥലത്തെ വൃത്തിഹീനമായ അവസ്ഥയെക്കുറിച്ച് വലിയ വാർത്തകൾ നിലനിന്നിരുന്നു. എന്നിട്ട് പോലും ഇത്തരം സാഹചര്യങ്ങൾ ഒഴിവാക്കാൻ വേണ്ട നടപടി റെയിൽവേ സ്വീകരിച്ചിട്ടില്ലെന്നാണ് വിമർശനം നിലനിൽക്കുന്നത്.

Expired soft drinks served to passengers on Vande Bharat Human Rights Commission registers case