2025 ഐപിഎൽ അവസാനഘട്ടത്തിലേക്ക് കടന്നിരിക്കുകയാണ്. ക്വാളിഫയർ വണ്ണിൽ പഞ്ചാബ് കിങ്സിനെ വീഴ്ത്തി റോയൽ ചലഞ്ചേഴ്‌സ് ബെംഗളൂരു ഫൈനലിലേക്ക് മുന്നേറിയിരിക്കുകയാണ്. ഐപിഎൽ അവസാനിക്കാനാവുമ്പോൾ ഈ സീസണിൽ രാജസ്ഥാൻ റോയൽസ് നായകൻ സഞ്ജു സാംസൺ മടങ്ങുന്നത് ഒരു മികച്ച റെക്കോർഡ് സ്വന്തമാക്കിയാണ്. 

ഐപിഎൽ ചരിത്രത്തിൽ ഏറ്റവും കൂടുതൽ തവണ 150+ സ്ട്രൈക്ക് റേറ്റിൽ 30+ റൺസ് സ്കോർ ചെയ്യുന്ന ഇന്ത്യൻ താരങ്ങളിൽ നാലാമനായിട്ടാണ് സഞ്ജു മാറിയത്. 37 തവണയാണ് രാജസ്ഥാൻ നായകൻ ഇത്തരത്തിൽ ബാറ്റ് വീശിയത്. എംഎസ് ധോണി(44), രോഹിത് ശർമ്മ(43), വിരാട് കോഹ്‌ലി(39) എന്നിവരാണ് സഞ്ജുവിന്റെ മുന്നിലുള്ളത്. 

രാജസ്ഥാൻ റോയൽസ് ഈ സീസണിൽ നിരാശാജനകമായ പ്രകടനമാണ്‌ പുറത്തെടുത്തത്. എട്ട് പോയിന്റുമായി ഒമ്പതാം സ്ഥാനത്താണ് രാജസ്ഥാൻ ഫിനിഷ് ചെയ്‌തത്. പരുക്കേറ്റതിന് പിന്നാലെ സഞ്ജുവിന് ധാരാളം മത്സരങ്ങൾ നഷ്ടമായിരുന്നു. 

ഡൽഹി ക്യാപ്പിറ്റൽസിനെതിരായ മത്സരത്തിൽ പരുക്കേറ്റ് സഞ്ജു പുറത്തായിരുന്നു. മത്സരത്തിൽ റിട്ടയേർഡ് ഹാർട്ടായാണ് സഞ്ജു മടങ്ങിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി. 

ഈ സീസണിൽ രാജസ്ഥാൻ റോയൽസിനൊപ്പം ഒരു പുതിയ നേട്ടവും സഞ്ജു സ്വന്തമാക്കിയിരുന്നു. ഐപിഎല്ലിൽ രാജസ്ഥാൻ റോയൽസിന് വേണ്ടി 4000 റൺസ് സ്വന്തമാക്കുന്ന ആദ്യ താരമായും സഞ്ജു മാറിയിരുന്നു. സഞ്ജുവും ബട്ലറും മാത്രമാണ് രാജസ്ഥാന് വേണ്ടി 3000 റൺസിന്‌ മുകളിൽ നേടിയിട്ടുള്ളൂ. 

Sanju Samson Create a Great Record in IPL