ബാംഗ്ലൂർ: ഐപിഎല്ലിൽ കഴിഞ്ഞ ദിവസം നടന്ന മത്സരത്തിൽ പഞ്ചാബ് കിങ്സിനെ എട്ട് വിക്കറ്റുകൾക്ക് പരാജയപ്പെടുത്തി റോയൽ ചലഞ്ചേഴ്‌സ് ബെംഗളൂരു ഫൈനലിലിക്ക് മുന്നേറിയിരുന്നു. ടോസ് നേടിയ ആർസിബി പഞ്ചാബിനെ ബാറ്റിങ്ങിനയക്കുകയായിരുന്നു. എന്നാൽ, ശ്രേയസ് അയ്യരും സംഘവും 14.1 ഓവറിൽ 101 റൺസിൽ ഓൾ ഔട്ടായി. മറുപടി ബാറ്റിങ്ങിൽ ആർസിബി 10 ഓവറിൽ 2 വിക്കറ്റ് നഷ്ടത്തിൽ ലക്ഷ്യം മറികടന്നു. 

ഫൈനലിലേക്ക് മുന്നേറിയിട്ടും ആർസിബിക്ക് നിരാശ നൽകുന്ന വാർത്തകളാണ് നിലനിൽക്കുന്നത്. പരുക്കേറ്റ സൂപ്പർ താരം ടിം ഡേവിഡ് ഫൈനൽ മത്സരത്തിൽ കളിക്കുമോ എന്നതിന് ഇപ്പോഴും ഉറപ്പ് വന്നിട്ടില്ല. ഡേവിഡിന് പകരം ലിയാം ലിവിങ്സ്റ്റൺ ആയിരുന്നു പഞ്ചാബിനെതിരെ കളത്തിൽ ഇറങ്ങിയത്. ഇംഗ്ലണ്ട് താരത്തിന്റെ ഫോമില്ലായ്മയും ആർസിബിയെ അലട്ടുന്ന മറ്റൊരു പ്രശ്നമാണ്. 

അതേസമയം ഇത് നാലാം തവണയാണ് ആർസിബി ഐപിഎൽ ഫൈനലിൽ എത്തുന്നത്. എന്നാൽ ഇതുവരെ കിരീടം നോടാൻ സാധിച്ചിട്ടില്ല. പഞ്ചാബ് കിങ്‌സിന് ഇപ്പോഴും ഫൈനലിലെത്താനുള്ള അവസരമുണ്ട്. ഞായറാഴ്ച നടക്കുന്ന രണ്ടാം ക്വാലിഫയർ മത്സരം ജയിച്ചാൽ മതി. മൂന്നും, നാലും സ്ഥാനക്കാരായ ഗുജറാത്ത് ടൈറ്റൻസും മുംബൈ ഇന്ത്യൻസും ഇന്ന് നടക്കുന്ന എലിമിനേറ്റർ മത്സരത്തിൽ ഏറ്റുമുട്ടും. ഈ മത്സരത്തിലെ വിജയികളെയായിരിക്കും പഞ്ചാബ് രണ്ടാം ക്വാളിഫയറിൽ നേരിടുക. 

27 പന്തുകളിൽ, 3 സിക്‌സും, 6 ഫോറും സഹിതം 56 റൺസ് നേടിയ ഫിൽ സാൾട്ടാണ് ആർസിബിക്ക് അനായാസ വിജയം നേടിക്കൊടുത്തത്. നായകൻ രജത് പാട്ടീദാർ 15 റൺസുമായി പുറത്താകാതെ നിന്നപ്പോൾ, വിരാട് കോഹ്ലി 12 ഉം, മായങ്ക് അഗർവാൾ 19 ഉം റൺസെടുത്ത് പുറത്തായി. ജോഷ് ഹേസിൽവുഡ്, സുയാഷ് ശർമ എന്നിവരുടെ മൂന്ന് വിക്കറ്റ് പ്രകടനമാണ് പഞ്ചാബിനെ തകർത്തത്.