റിയാദ്: സഊദി അറേബ്യയില്‍ ഗാര്‍ഹിക തൊഴിലാളികള്‍ക്ക് ഇനി ജോലി കണ്ടെത്താനായി അലയേണ്ടതില്ല. എളുപ്പത്തില്‍ ജോലി കണ്ടെത്താനായി മുസാനിദ് (Musaned) പ്ലാറ്റ്‌ഫോം അവതരിപ്പിച്ചിരിക്കുകയാണ് മാനവ വിഭവ ശേഷി സാമൂഹിക വികസന മന്ത്രാലയം. പുതിയ സേവനംവഴി തൊഴില്‍ ആവശ്യമുള്ളവര്‍ക്ക് മുസാനിദ് പ്ലാറ്റ്‌ഫോമിലൂടെ സിവികള്‍ അപ്ലോഡ് ചെയ്യാം. 

സേവനം പൂര്‍ണ്ണമായും ഓട്ടോമേറ്റഡ് ആയതിനാല്‍ തൊഴിലുടമകള്‍ക്ക് രാജ്യത്തെ ഗാര്‍ഹിക തൊഴിലാളികളെ എളുപ്പത്തില്‍ തെരഞ്ഞെടുക്കാന്‍ കഴിയും. തൊഴില്‍ കരാര്‍ അവസാനിച്ചതിനു ശേഷം തൊഴിലാളിക്ക് അനുഭവം രേഖപ്പെടുത്താനുള്ള സൗകര്യവും മുസാനിദില്‍ ഉണ്ട്. പുതിയ സംവിധാനത്തിലൂടെ തൊഴിലുടമക്ക് അനുയോജ്യമായ തൊഴിലാളികളെ മുസാനിദ് മുഖേന കണ്ടെത്താന്‍ കഴിയും. തൊഴിലാളിക്ക് എളുപ്പത്തില്‍ ജോലി ലഭ്യമാക്കാനും സാധിക്കും. 

2023ല്‍ സഊദി അറേബ്യ ഗാര്‍ഹിക തൊഴിലാളികളെ നിയമിക്കുന്നതിനുള്ള പുതിയ നിയമങ്ങള്‍ പുറത്തിറക്കിയിരുന്നു. കരാര്‍ അവകാശങ്ങള്‍ സംരക്ഷിക്കാനായി ഏറ്റവും കുറഞ്ഞ പ്രായം 21 ആയി നിശ്ചയിക്കുകയുണ്ടായി. തൊഴിലാളികള്‍ക്കോ അവരുടെ അവകാശികള്‍ക്കോ നല്‍കേണ്ട കുടിശ്ശികകള്‍ ഫസ്റ്റ്ഡിഗ്രി കടങ്ങളായി കണക്കാക്കണമെന്നാണ് ചട്ടങ്ങള്‍ പറയുന്നത്. കരാറുകള്‍ക്ക് നിശ്ചിത കാലയളവ് ഉണ്ടായിരിക്കണം. ഇല്ലെങ്കില്‍ തൊഴിലാളിയുടെ സ്റ്റാര്‍ട്ടിങ് ഡേറ്റ് മുതല്‍ ഒരു വര്‍ഷത്തേക്ക് അവ പുതുക്കാവുന്നതായി കണക്കാക്കും.

സിവികളുടെയും ട്രാന്‍സ്ഫറിന്റെയും അടിസ്ഥാനത്തില്‍ തൊഴിലാളികളെ തിരഞ്ഞെടുക്കുന്നതിനുള്ള നൂതന രീതിയാണ് പുതിയ സേവനമെന്ന് മന്ത്രാലയം പറഞ്ഞു. തൊഴിലുടമയും തൊഴിലാളിയും തമ്മിലുള്ള അവകാശങ്ങള്‍ സംരക്ഷിക്കുന്നതിന്റെ ഭാഗമായാണ് സംവിധാനമെന്ന് മാനവ വിഭവ ശേഷി സാമൂഹിക വികസന മന്ത്രാലയം അറിയിച്ചു. തൊഴില്‍ മേഖലയെ കൂടുതല്‍ സുതാര്യവും കാര്യക്ഷമവുമാക്കുകയും ഒപ്പം തൊഴിലാളിയുടെ അവകാശങ്ങള്‍ സംരക്ഷിക്കുകയുമാണ് ഇതിലൂടെ ലക്ഷ്യമിടുന്നതെന്നും മന്ത്രാലയം കൂട്ടിച്ചേര്‍ത്തു.

CV upload service for domestic workers via a Saudi government platform to facilitate employees' transfer. Saudi Ministry of Human Resources said the new service is an innovative method for facilitating the selection of workers based on their CVs.