ഇംഗ്ലണ്ട് ലയൺസിനെതിരെയുള്ള മത്സരത്തിൽ ഡബിൾ സെഞ്ച്വറി നേടി മലയാളി താരം കരുൺ നായർ. നീണ്ട എട്ടു വർഷത്തിനുശേഷം ഇന്ത്യൻ ടീമിൽ തിരിച്ചെത്തിയ കരുണിന്റെ മാസ്മരിക പ്രകടനങ്ങൾക്കാണ് ക്രിക്കറ്റ് ലോകം സാക്ഷിയായത്. ഇന്ത്യ എക്ക് വേണ്ടിയാണ് താരം ഇരട്ട സെഞ്ച്വറി നേടി തിളങ്ങിയത്. 281 പന്തിൽ 26 ഫോറുകളും ഒരു സിക്സും ഉൾപ്പെടെ 204 റൺസാണ് കരുൺ അടിച്ചെടുത്തത്.

നീണ്ട എട്ട് വർഷങ്ങൾക്ക് ശേഷമാണ് കരുൺ നായർ ഇന്ത്യൻ ടെസ്റ്റ് ടീമിലേക്ക് മടങ്ങിയെത്തിയത്. 2017ൽ ഓസ്‌ട്രേലിയയ്‌ക്കെതിരെയാണ് കരുൺ നായർ അവസാനമായി ഇന്ത്യക്ക്  വേണ്ടി കളിച്ചത്. ഇന്ത്യക്കായി ടെസ്റ്റ് ക്രിക്കറ്റിൽ ട്രിപ്പിൾ സെഞ്ച്വറി നേടിയ താരം കൂടിയാണ് കരുൺ നായർ. 2016ൽ ഇംഗ്ലണ്ടിനെതിരെയായിരുന്നു താരം ട്രിപ്പിൾ സെഞ്ച്വറി നേടിയത്. ടെസ്റ്റ് ക്രിക്കറ്റിൽ വീരേന്ദർ സെവാഗിന് ശേഷം ട്രിപ്പിൾ സെഞ്ച്വറി നേടുന്ന രണ്ടാമത്തെ ഇന്ത്യൻ താരം കൂടിയാണ് കരുൺ. 

സമീപകാലങ്ങളിൽ ആഭ്യന്തര ക്രിക്കറ്റിൽ നടത്തിയ മികച്ച പ്രകടനങ്ങൾക്ക് പിന്നാലെയാണ് കരുൺ വീണ്ടും ഇന്ത്യൻ ടീമിൽ ഇടം നേടിരിക്കുന്നത്. 2025ലെ രഞ്ജി ട്രോഫിയിലെ വിദർഭയുടെ കിരീട നേട്ടത്തിൽ നിർണായകമായ പങ്കുവഹിച്ച താരമാണ് കരുൺ. 16 ഇന്നിങ്സിൽ നിന്നും 53.9 എന്ന മികച്ച ആവറേജിൽ 863 റൺസാണ് കരുൺ അടിച്ചെടുത്തത്.

അതേസമയം ഇംഗ്ലണ്ട് ലയൺസിനെതിരെ ആദ്യ ഇന്നിങ്സിൽ 557 റൺസിന്റെ കൂറ്റൻ ടോട്ടൽ ആണ് ഇന്ത്യ നേടിയത്. ധ്രുവ് ജുറൽ, സർഫറാസ് ഖാൻ എന്നിവർ അർദ്ധ സെഞ്ച്വറി നേടി തിളങ്ങി. 120 പന്തിൽ 94 റൺസാണ് ജുറൽ സ്വന്തമാക്കിയത്. 11 ഫോണുകളും ഒരു സിക്സും ഉൾപ്പെടുന്നതായിരുന്നു താരത്തിന്റെ ഇന്നിങ്സ്. ഇംഗ്ലണ്ട് ലയൺസിന് വേണ്ടി സമാൻ അക്തർ, ജോഷ് ഹുൾ എന്നിവർ മൂന്ന് വിക്കറ്റുകളും എഡി ജാക് രണ്ടു വിക്കറ്റും സ്വന്തമാക്കി.

karun nair score double century vs england