ഹൈദരാബാദ്: പഹൽഗാം ഭീകരാക്രമണത്തിന് പ്രതികാരം ചെയ്യണമെന്നും ഓപ്പറേഷൻ സിന്ദൂർ തുടരണമെന്നും എഐഎംഐഎം പ്രസിഡന്റ് അസദുദ്ദീൻ ഒവൈസി. പഹൽഗാം ഭീകരാക്രമണം മോദി സർക്കാരിന്റെ സുരക്ഷാ വീഴ്ചയുടെ ഉദാഹരണമാണെന്ന് അദ്ദേഹം ആരോപിച്ചു. വഖഫ് (ഭേദഗതി) നിയമത്തിനെതിരെ പ്രതിഷേധിച്ച് ബുധനാഴ്ച രാത്രി തെലങ്കാനയിലെ ബോധൻ പട്ടണത്തിൽ സംഘടിപ്പിച്ച പൊതുയോഗത്തിലാണ് ഒവൈസിയുടെ വിമർശനം. വഖഫ് നിയമം കരിനിയമം ആണെന്നും അദ്ദേഹം പറഞ്ഞു.

പഹൽഗാമിന് പ്രതികാരം ചെയ്യണം. ഓപ്പറേഷൻ സിന്ദൂർ തുടരുക. 26 ഇന്ത്യക്കാരെ കൊന്ന നാല് തീവ്രവാദികളെ പിടികൂടി കൊല്ലുന്നത് വരെ ഞങ്ങൾ നിങ്ങളെ ചോദ്യം ചെയ്യും". മോദി സർക്കാരിന്റെ സുരക്ഷാ വീഴ്ചയുടെ വിജയകരമായ ഉദാഹരണമാണ് പഹൽഗാം -  അസദുദ്ദീൻ ഒവൈസി പറഞ്ഞു. 

ALSO READ: ഇന്ധന നിയന്ത്രണ സ്വിച്ച് ഓഫ് ചെയ്തത് ക്യാപ്റ്റന്‍?; അഹമ്മദാബാദ് വിമാനാപകടത്തില്‍ വാള്‍ സ്ട്രീറ്റ് ജേര്‍ണല്‍ റിപ്പോര്‍ട്ട്

പഹൽഗാം ഭീകരാക്രമണത്തിന്റെ "സുരക്ഷാ പരാജയത്തിന്റെ" ഉത്തരവാദിത്തം താൻ ഏറ്റെടുക്കുന്നുവെന്ന ജമ്മു കശ്മീർ ഗവർണർ മനോജ് സിൻഹയുടെ പ്രസ്താവനയെയും ഒവൈസി രൂക്ഷമായി വിമർശിച്ചു. സംഭവം നടന്ന് മൂന്ന് മാസത്തിന് ശേഷമാണ് സിൻഹ ഉത്തരവാദിത്തം ഏറ്റെടുക്കുന്നത്. ഇതിന് ഉത്തരവാദി അദ്ദേഹമാണെങ്കിൽ അദ്ദേഹം സ്ഥാനം രാജിവയ്ക്കണമെന്ന് ഒവൈസി പറഞ്ഞു.

രാജ്യത്ത് നടക്കുന്ന വീടുകൾ തകർക്കൽ, ബുൾഡോസറുകൾ ഉപയോഗിച്ച് ആക്രമണം, പള്ളികൾ തട്ടിയെടുക്കൽ തുടങ്ങിയവ രാജ്യത്തിന് നല്ലതല്ലെന്നും ഒവൈസി പറഞ്ഞു. ബംഗ്ലാദേശിൽ ചൈന സ്വാധീനം വ്യാപിപ്പിക്കുന്ന സമയത്ത്, രാജ്യത്തെ ചിലർ കെട്ടിടങ്ങൾ പൊളിച്ചുമാറ്റൽ, ബുൾഡോസർ എന്നിവയെക്കുറിച്ച് സംസാരിക്കുയാണ്. ചൈനയിൽ നിന്നും പാകിസ്ഥാനിൽ നിന്നും രാജ്യം ഭീഷണി നേരിടുന്നുവെന്ന് ബിജെപി നേതാക്കളോട് പറയാൻ ആഗ്രഹിക്കുന്നുവെന്നും ഒവൈസി വ്യക്തമാക്കി.