ലഖ്‌നൗ: സുപ്രിംകോടതിയുടെ കര്‍ശന മാര്‍ഗനിര്‍ദേശങ്ങള്‍ ലംഘിച്ച് ഉത്തര്‍പ്രദേശിലെ യോഗി ആദിത്യനാഥ് സര്‍ക്കാര്‍ വീണ്ടും ബുള്‍ഡോസര്‍രാജുമായി രംഗത്ത്. സഹാറന്‍പൂരില്‍ നിര്‍മാണത്തിലുള്ള പള്ളി നോട്ടിസ് പോലും നല്‍കാതെ പൊളിച്ചുനീക്കി. നകുര്‍ ബ്ലോക്കിലെ ഭോജ്പൂര്‍ ഗ്രാമത്തില്‍ സ്ഥിതിചെയ്തിരുന്ന പള്ളിയാണ് തകര്‍ത്തത്. പ്രദേശത്തെ ഹിന്ദുത്വ സംഘടനകളുടെ പരാതിയെത്തുടര്‍ന്ന് ജില്ലാഭരണകൂടം ഇടപെട്ടതിനാല്‍ ഒരു മാസമായി പള്ളിയുടെ നിര്‍മാണം നിര്‍ത്തിവച്ചിരിക്കുകയായിരുന്നു.

മുന്‍കൂര്‍ അറിയിപ്പ് കൂടാതെ അധികാരികള്‍ പള്ളി പൊളിച്ചുമാറ്റിയെന്ന് ചൂണ്ടിക്കാട്ടി പ്രദേശത്തെ വിശ്വാസികളും പള്ളി കമ്മിറ്റിയും പ്രതിഷേധവുമായി രംഗത്തുവന്നു. പള്ളി പൊളിക്കുന്നതിന് മുമ്പ് ജില്ലാ മജിസ്‌ട്രേറ്റ് മതിയായ നടപടിക്രമങ്ങള്‍ പാലിച്ചില്ലെന്ന് സഹാറന്‍പൂരില്‍ നിന്നുള്ള കോണ്‍ഗ്രസ് എം.പി ഇമ്രാന്‍ മസൂദ് പറഞ്ഞു. 1863ലെ വഖ്ഫ് നിയമത്തില്‍ മതപരമായ ഘടന നിര്‍മിക്കുന്നതിന് അനുമതി ആവശ്യമുള്ള വ്യവസ്ഥ അടങ്ങിയിട്ടില്ലെന്നും അദ്ദേഹം കൂട്ടിച്ചേര്‍ത്തു.

സ്ഥലത്തിന്റെ ഭൂപടത്തിന് ഔപചാരിക അംഗീകാരം ലഭിച്ചില്ലെന്ന് ആരോപിച്ച് നേരത്തെ പൊലിസ് നിര്‍മാണം നിര്‍ത്തിവച്ചിരുന്നതായി ഭോജ്പൂര്‍ പഞ്ചായത്തിലെ മുന്‍ പ്രധാന്‍ വാജിദ് അലി പറഞ്ഞു. ഇതോടെ അനുമതിയാവശ്യപ്പെട്ട് പള്ളി കമ്മിറ്റി ജില്ലാ പഞ്ചായത്ത് ചെയര്‍മാനെ സമീപിച്ചു. എന്നാൽ ഇത്തരം നടപടികളില്‍ തനിക്ക് അധികാരമില്ലെന്ന് പറഞ്ഞ് ഒഴിഞ്ഞുമാറിയ ചെയര്‍മാൻ ജില്ലാ മജിസ്‌ട്രേറ്റിനെ (ഡി.എം) സമീപിക്കാന്‍ ഉപദേശിക്കുകയുംചെയ്തു.

ഇതുപ്രകാരം ഫെബ്രുവരിയില്‍ മജിസ്‌ട്രേറ്റ് മുമ്പാകെ അപേക്ഷസമര്‍പ്പിച്ചു. ജില്ലാ പഞ്ചായത്തിലെ ചീഫ് എക്സിക്യൂട്ടിവ് ഓഫിസറെ (എ.എം.എ) സമീക്കാന്‍ അദ്ദേഹം ആവശ്യപ്പെട്ടു. ഇത് മതപരമായ നിര്‍മിതിയായതിനാല്‍ നിർമാണവുമായി മുന്നോട്ടുപോകാമെന്ന് എ.എം.എ പറഞ്ഞു. ഇതിനിടെയാണ് വ്യാഴാഴ്ച രാവിലെ എസ്.ഡി.എം സദര്‍ സുബോധ് കുമാര്‍ വന്‍ പൊലിസ് സന്നാഹത്തോടെയെത്തി മൂന്ന് ബുള്‍ഡോസറുകള്‍ ഉപയോഗിച്ച് പള്ളി പൊളിച്ചുമാറ്റിയത്. 2023ല്‍ പ്രദേശത്തെ രണ്ട് മുസ്‌ലിംകള്‍ പള്ളി നിര്‍മിക്കാന്‍ വഖ്ഫ് ചെയ്ത സ്ഥലമാണിത്. പിന്നീട് പ്ലാസ്റ്റിക് ഷീറ്റുകള്‍ ഉപയോഗിച്ച് ഉണ്ടാക്കിയ താല്‍ക്കാലിക സ്ഥലത്ത് നാളിതുവരെയും നിസ്‌കരിച്ചുവരികയായിരുന്നു.

In another instance of "Bulldozer Raj" in Uttar Pradesh, a church was demolished without prior notice, sparking outrage among the local Christian community and raising concerns over due process and religious freedom.