മലപ്പുറം: മുഖ്യമന്ത്രി പിണറായി വിജയനെതിരെ രൂക്ഷവിമർശനവുമായി എഐസിസി ജനറൽ സെക്രട്ടറി കെ.സി. വേണുഗോപാൽ. മലപ്പുറം ജില്ലയെ സംശയത്തിന്റെ നിഴലിൽ നിർത്തിയത് മുഖ്യമന്ത്രിയാണെന്നും തൃശ്ശൂരിൽ എൽഡിഎഫ് സ്ഥാനാർത്ഥിയെ തോൽപ്പിച്ചത് പിണറായിയുടെ 'ചതി'യാണെന്നും അദ്ദേഹം ആരോപിച്ചു. യുഡിഎഫ് തിരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് സംസാരിക്കവെയാണ് കെ.സി. വേണുഗോപാൽ മുഖ്യമന്ത്രിക്കെതിരെ ആഞ്ഞടിച്ചത്.

നിലമ്പൂരിൽ നടന്ന എൽഡിഎഫ് കൺവെൻഷനിൽ മുഖ്യമന്ത്രി 'ചതി'യെക്കുറിച്ച് സംസാരിച്ചിരുന്നുവെന്നും, ചതിയെക്കുറിച്ച് സംസാരിക്കാൻ ഏറ്റവും യോഗ്യൻ പിണറായി വിജയനാണെന്നും അദ്ദേഹം കുറ്റപ്പെടുത്തി. "മലപ്പുറത്തെ മാത്രം സംശയത്തിന്റെ നിഴലിൽ നിർത്തി. എല്ലാ ജില്ലകളിലും സ്വർണം പിടിക്കുമ്പോൾ മറ്റ് ജില്ലകളെക്കുറിച്ച് ഒന്നും പറയാതെ മലപ്പുറത്തെ മാത്രം വിമർശിച്ചു. പാണക്കാട് തങ്ങളെ വിമർശിക്കുന്നത് കണ്ടു. പാണക്കാട് കുടുംബം രാഷ്ട്രീയ പാർട്ടിയുടെ ഭാഗമാണെങ്കിലും അതു മാത്രമാണോ അവർ?" കെ.സി. വേണുഗോപാൽ ചോദിച്ചു.

തൃശ്ശൂർ തിരഞ്ഞെടുപ്പിൽ എൽഡിഎഫ് സ്ഥാനാർത്ഥിയെ തോൽപ്പിച്ച് ബിജെപിക്ക് പാർലമെന്റിൽ ഒരു സീറ്റ് ഉറപ്പാക്കാൻ മുഖ്യമന്ത്രി സഹായിച്ചുവെന്നും, തൃശ്ശൂർ പൂരം കലക്കി ഈ ലക്ഷ്യം നേടിയെന്നും അദ്ദേഹം ആരോപിച്ചു. "ആശ വർക്കർമാരെ അധിക്ഷേപിച്ചു, ദേശീയ പാതയുടെ തകർച്ചയ്ക്ക് ഉത്തരവാദി മുഖ്യമന്ത്രിയാണ്," അദ്ദേഹം കൂട്ടിച്ചേർത്തു.

ദേശീയ പാത നിർമാണത്തിലെ ക്രമക്കേടുകളെക്കുറിച്ചും കെ.സി. വേണുഗോപാൽ സംസാരിച്ചു. "മുഖ്യമന്ത്രി കൂരിയാട് സന്ദർശിക്കാൻ തയാറായില്ല. ദേശീയ പാതയുടെ അപകടങ്ങൾ ചർച്ച ചെയ്യേണ്ട വിഷയമാണ്. ഇതിന്റെ ക്രെഡിറ്റ് എടുത്ത മുഖ്യമന്ത്രി, തകർച്ചയുടെ ഉത്തരവാദിത്തം ആർക്കാണ്?" അദ്ദേഹം ചോദിച്ചു. ദേശീയ പാത അതോറിറ്റി പരിശോധന നടത്തണമെന്ന് മുഖ്യമന്ത്രി ആവശ്യപ്പെട്ടില്ലെന്നും, പബ്ലിക് അക്കൗണ്ട്‌സ് കമ്മിറ്റിയാണ് പരിശോധന ആവശ്യപ്പെട്ടതെന്നും അദ്ദേഹം വ്യക്തമാക്കി.

"കേരളം അപമാനം കൊണ്ട് തലകുനിച്ചു. പിണറായിയുടെ കൈയിലെ പാപക്കറ അറേബ്യൻ സുഗന്ധദ്രവ്യങ്ങൾ കൊണ്ട് പോലും കഴുകിക്കളയാനാവില്ല," അദ്ദേഹം കുറ്റപ്പെടുത്തി. തിരഞ്ഞെടുപ്പ് കാലത്ത് പെൻഷനെ കൈക്കൂലിയാക്കി മാറ്റിയെന്നും, സാധാരണക്കാർക്ക് ജീവിക്കാൻ പ്രയാസമുള്ള സാഹചര്യമാണ് സർക്കാർ സൃഷ്ടിച്ചതെന്നും അദ്ദേഹം ആരോപിച്ചു.

വന്യമൃഗ ആക്രമണങ്ങളെ തടയാൻ സർക്കാർ ഒന്നും ചെയ്തില്ലെന്നും, നിലമ്പൂരിൽ മാത്രം എത്ര സംഭവങ്ങൾ ഉണ്ടായെന്നും കെ.സി. വേണുഗോപാൽ ചോദിച്ചു. "ഒരു കപ്പൽ മുങ്ങിയപ്പോൾ മഹാരാഷ്ട്രയിൽ കമ്പനിക്കെതിരെ കേസെടുത്തു, നഷ്ടപരിഹാരം നൽകി. എന്നാൽ, കേരളത്തിൽ സാധാരണക്കാരെ വന്യമൃഗങ്ങൾക്ക് മുന്നിൽ തള്ളിയിടുകയാണ്," അദ്ദേഹം വിമർശിച്ചു.

തൃശ്ശൂരിൽ ബിജെപി സ്ഥാനാർത്ഥിയെ നിർത്തിയതിന്റെ ലക്ഷ്യം വ്യക്തമാണെന്നും, എന്നാൽ അത് നടക്കില്ലെന്നും അദ്ദേഹം പറഞ്ഞു. "യഥാർത്ഥ കമ്മ്യൂണിസ്റ്റുകാർ പോലും ഈ സർക്കാരിൽ നിന്ന് മോചനം ആഗ്രഹിക്കുന്നു," അദ്ദേഹം കൂട്ടിച്ചേർത്തു. കൺവെൻഷനിൽ കെ.സി. വേണുഗോപാലിന്റെ പ്രസംഗത്തിന് ശേഷം, യുഡിഎഫ് സ്ഥാനാർത്ഥി ആര്യാടൻ ഷൗക്കത്തിനെ പ്രവർത്തകർ തോളിലേറ്റി വേദിയിലെത്തിച്ചു. "ഏത് വമ്പനായാലും, വിജയിക്കുന്നത് ആര്യാടൻ ഷൗക്കത്തായിരിക്കും," മലപ്പുറം ഡിസിസി പ്രസിഡന്റ് വി.എസ്. ജോയ് പ്രഖ്യാപിച്ചു.