അബൂദബി: യുഎഇയിൽ ക്രിപ്‌റ്റോകറൻസികൾ ദൈനംദിന ജീവിതത്തിന്റെ അവിഭാജ്യ ഘടകമായി മാറിക്കൊണ്ടിരിക്കുകയാണ്. ഡിജിറ്റൽ പേയ്‌മെന്റുകൾ കൂടുതൽ മുഖ്യധാരയിലാകുന്നതോടെ യുഎഇ നിവാസികൾക്ക് ഉടൻ തന്നെ പതിവ് വീട്ടുബില്ലുകൾ, പലചരക്ക് സാധനങ്ങൾ, ട്രാഫിക് പിഴകൾ എന്നിവ അടയ്ക്കാനും ക്രിപ്‌റ്റോകറൻസിയിൽ ശമ്പളം പോലും ലഭിക്കാനും കഴിയുമെന്നും ഈ രംഗത്തുള്ളവർ പറയുന്നു. യുവതലമുറ സാങ്കേതികവിദ്യയിൽ താൽപര്യം വർദ്ധിപ്പിക്കുന്നതിനാൽ പൊതു, സ്വകാര്യ മേഖലകൾ ഡിജിറ്റൽ കറൻസികളുടെ സ്വീകാര്യതയെ സജീവമായി പ്രോത്സാഹിപ്പിക്കുന്നതായും റിപ്പോർട്ടുകൾ സൂചിപ്പിക്കുന്നു.

 സർക്കാർ സേവനങ്ങൾക്കായി ക്രിപ്‌റ്റോകറൻസി പേയ്‌മെന്റുകൾ പ്രാപ്തമാക്കുന്നതിനുള്ള പദ്ധതികൾ ദുബായ് അടുത്തിടെ പ്രഖ്യാപിച്ചിരുന്നു. ദുബായിയുടെ ധനകാര്യ വകുപ്പും ആഗോള ക്രിപ്‌റ്റോകറൻസി ട്രേഡിംഗ് പ്ലാറ്റ്‌ഫോമായ ക്രിപ്‌റ്റോ.കോമും തമ്മിലുള്ള കരാറിനെ തുടർന്നാണ് ഈ നീക്കം. ക്രിപ്‌റ്റോകറൻസി ഉപയോഗിച്ച് സർക്കാർ സേവനങ്ങൾക്ക് പണമടയ്ക്കാൻ താമസക്കാരെ അനുവദിക്കാനുള്ള ദുബായിയുടെ തീരുമാനം സാങ്കേതികവിദ്യയെ കൂടുതൽ സജീവമാക്കി. 

കാലക്രമേണ ഡിജിറ്റൽ കറൻസികളുടെ സ്വീകാര്യതയും പരിണാമവും വളരുമെന്നു ഈ രംഗത്തുള്ളവർ പറയുന്നു. ഒരേ ഡിജിറ്റൽ വാലറ്റ് ഉപയോഗിച്ച് ആളുകൾക്ക് ട്രാഫിക് പിഴകൾ അടക്കാനോ വീട്ടിലേക്ക് പണം അയയ്ക്കാനോ കഴിയുന്ന കാലത്തിൽ നിന്ന് നമ്മൾ വളരെ അകലെയല്ല. അവ ഭാവിയിലെ ഒരു നവീകരണമായി തോന്നാം. പക്ഷേ അവ ഇപ്പോൾ യഥാർത്ഥ ലോകത്തിലെ പ്രശ്നങ്ങൾ പരിഹരിക്കുകയാണ്. ഉയർന്ന പണപ്പെരുപ്പമുള്ള രാജ്യങ്ങളിൽ, ആളുകൾ അവരുടെ സമ്പാദ്യത്തിന്റെ മൂല്യം സംരക്ഷിക്കാൻ സ്റ്റേബിൾകോയിനുകൾ ഉപയോഗിക്കുന്നു. പരമ്പരാഗത രീതികളേക്കാൾ വേഗത്തിലും കുറഞ്ഞ ചെലവിലും വിദേശത്തേക്ക് പണം അയയ്ക്കാൻ മറ്റുള്ളവർ അവയെ ആശ്രയിക്കുന്നു. ഇവ വെർച്വൽ ആസ്തികളുടെ പ്രായോഗികവും ദൈനംദിനവുമായ പ്രയോഗങ്ങളാണ്- വിദഗ്ധര് അഭിപ്രായപ്പെട്ടു.

 പ്രോപ്പർട്ടി ഡെവലപ്പർമാർ, എയർലൈനുകൾ, ഇന്ധന റീട്ടെയിലർമാർ എന്നിവയുൾപ്പെടെ നിരവധി കമ്പനികൾ ക്രിപ്‌റ്റോകറൻസിയെ പേയ്‌മെന്റ് രീതിയായി സ്വീകരിക്കാൻ തുടങ്ങിയിട്ടുണ്ട്. കഴിഞ്ഞ വർഷം ഒരു ദുബായ് കോടതി ഒരു കമ്പനിക്ക് അവരുടെ കരാറിൽ പറഞ്ഞിരിക്കുന്നതുപോലെ ജീവനക്കാരന്റെ കുടിശ്ശിക ദിർഹത്തിലും ക്രിപ്‌റ്റോകറൻസിയിലും അടയ്ക്കാൻ ഉത്തരവിട്ടു. 

പെട്രോള്‍ സ്‌റ്റേഷനുകളില്‍ ക്രിപ്റ്റോ കറന്‍സി ഉപയോഗിച്ചുള്ള സാമ്പത്തിക ഇടപാടുകള്‍ക്ക് ഈ അടുത്താണ് യുഎഇയില്‍ തുടക്കമായത്. രാജ്യത്തെ പ്രമുഖ പെട്രോളിയം കമ്പനിയായ എമിറാത്തും ക്രിപ്‌റ്റോകറന്‍സി സേവനദാതാക്കളായ ക്രിപ്‌റ്റോ ഡോട്ട് കോമും ചേര്‍ന്നാണ് പദ്ധതിക്ക് തുടക്കമിട്ടത്. മിഡില്‍ ഈസ്റ്റും വടക്കന്‍ ആഫ്രിക്കയും ചേര്‍ന്നുള്ള മേഖലയില്‍ ആദ്യമായാണ് ഒരു രാജ്യം പെട്രോള്‍സ്‌റ്റേഷനുകളില്‍ ക്രോപ്‌റ്റോ കറന്‍സി അനുവദിക്കുന്നതെന്ന പ്രത്യേകത ഉണ്ട്.

തുടക്കം 10 കേന്ദ്രങ്ങളില്‍

ദുബൈ നഗരത്തിലെ 10 കേന്ദ്രങ്ങളിലാണ് ഈ സൗകര്യം ആരംഭിച്ചത്. ഉപയോക്താക്കള്‍ക്ക് ബിറ്റ്‌കോയിന്‍ ഉള്‍പ്പടെയുള്ള വിവിധ ക്രിപ്‌റ്റോകറന്‍സികള്‍ ഉപയോഗിച്ച് ഡിജിറ്റല്‍ ഇടപാടുകള്‍ നടത്താനാകും. വൈകാതെ മറ്റ് എമിറേറ്റുകളിലും ഈ സൗകര്യം ഏര്‍പ്പെടുത്തും. എമിറാത്തിന് ദുബൈയിലും വടക്കന്‍ യുഎഇയിലുമായി 100 പെട്രോള്‍ സ്‌റ്റേഷനുകളാണുള്ളത്.

UAE: Soon, residents can get salaries, pay bills, traffic fines through cryptocurrency