ആലപ്പുഴ: മുല്ലക്കൽ തെരുവിലെ സമൂഹമഠത്തിൽ വീടുകൾക്ക് തീപിടിച്ചു. സംഭവത്തിൽ ഒരു വീട് പൂർണമായും കത്തി നശിച്ചു. ഈ വീടിന്റെ ഇതേ നിരയിലുള്ള രണ്ട് വീടുകളിലേക്ക് തീ പടരുകയും ചെയ്തു. ഏകദേശം 75 വർഷത്തോളം പഴക്കമുള്ള പൂർണമായും തടികൊണ്ട് നിർമ്മിച്ച വീടുകളാണ് ഇവിടെയുള്ളത് ഇതാണ് തീ ആളിക്കത്താൻ കാരണമായത്. 

പൂർണമായും കത്തി നശിച്ച വീടുകളിലെ ആളുകൾ ക്ഷേത്രത്തിൽ പോയ സമയത്തായിരുന്നു തീപിടുത്തം നടന്നത്. ഇവിടെ നിന്നാണ് മറ്റ് വീടുകളിലേക്ക് തീ പടർന്നതെന്നാണ് കരുതുന്നത്. വീടിനുള്ളിൽ നിന്നും പൊട്ടിത്തെറിയുടെ ശബ്ദം കേട്ടുവെന്ന് നാട്ടുകാർ പറഞ്ഞു. ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം. 

ഇന്ന് വൈകുന്നേരം 6.45ഓടെയാണ് അപകടം നടന്നത്. ഫയർ ഫോഴ്‌സിന്റെ മൂന്ന് യൂണിറ്റുകൾ സംഭവ സ്ഥലത്തെത്തി തീ അണക്കുകയായിരുന്നു. വീടുകളിൽ ആളുകൾ ഇല്ലാത്തതുകൊണ്ട് വലിയ ദുരന്തം ഒഴിവാകുകയായിരുന്നു.

Fire breaks out at Alappuzha community monastery houses destroyed