ലണ്ടൻ: ടോട്ടൻഹാം ഹോട്സ്പർ മുഖ്യ പരിശീലകൻ ആഞ്ചെ പോസ്റ്റെകോഗ്ലോയെ പുറത്താക്കി. ഈ സീസണിലെ ഇംഗ്ലീഷ് പ്രീമിയർ ലീഗിലെ സ്പർസിന്റെ മോശം പ്രകടനങ്ങൾക്ക് പിന്നാലെയാണ് ടോട്ടൻഹാം ഈ തീരുമാനത്തിലെത്തിയത്. ഈ സീസണിൽ ഇപിഎല്ലിൽ പതിനേഴാം സ്ഥാനത്താണ് ടോട്ടൻഹാം ഫിനിഷ് ചെയ്തത്. 38 മത്സരങ്ങളിൽ നിന്നും 11 ജയവും അഞ്ചു സമനിലയും 22 തോൽവിയുമായി 38 പോയിന്റ് മാത്രമാണ് ടോട്ടൻഹാമിന് ഈ സീസണിൽ നേടാനായത്. 

ഇംഗ്ലീഷ് പ്രീമിയർ ലീഗിൽ ഈ സീസണിൽ  കാസ്റ്റിൽ യുണൈറ്റഡിനെതിരെയുള്ള മത്സരത്തിൽ സ്വന്തം തട്ടകത്തിൽ തോൽവി നേരിട്ടതോടെ 1993-94 സീസണിന് ശേഷം സ്വന്തം തട്ടകത്തിൽ തുടർച്ചയായ ആറ് മത്സരങ്ങളിലും വിജയം നേടാൻ ടോട്ടൻഹാമിന് സാധിക്കാതെ പോയിരുന്നു. മത്സരത്തിൽ ന്യൂകാസ്റ്റിൽ യുണൈറ്റഡ് ഒന്നിനെതിരെ രണ്ട് ഗോളുകൾക്കാണ് ടോട്ടൻഹാമിനെ പരാജയപ്പെടുത്തിയത്. 

ന്യൂകാസ്റ്റിൽ യൂണൈറ്റഡിനോട് കളിക്കുന്നതിന് മുമ്പ് നടന്ന അഞ്ചു മൽസരങ്ങളിൽ മൂന്ന് തോൽവിയും രണ്ട് സമനിലയുമാണ് ടോട്ടൻഹാം നേരിട്ടത്. ലിവർപൂളിനെതിരെ 6-3, ചെൽസിക്കെതിരെ 4-3, ഇപ്സ്വിച് ടുണിനെതിരെ 2-1 എന്ന സ്കോറുകൾക്കായിരുന്നു സ്പർസ്‌ പരാജയപ്പെട്ടത്. വോൾവസിനെതിരെ 2-2 ഫുൾഹാമിനെതിരെ 1-1 എന്ന സ്കോറുകൾക്ക് സമനിലയാവുകയും ചെയ്തു.

ഈ സീസണിൽ ഇംഗ്ലീഷ് പ്രീമിയർ ലീഗിൽ മോശം പ്രകടനം നടത്തിയെങ്കിലും യൂറോപ്പ ലീഗ് കിരീടം ടോട്ടൻഹാം സ്വന്തമാക്കിയിരുന്നു. ഫൈനലിൽ മാഞ്ചസ്റ്റർ യുനൈറ്റഡിനെ പരാജയപ്പെടുത്തിയാണ് ടോട്ടൻഹാം കിരീടം ചൂടിയത്. സ്‌പെയിനിലെ ബിൽബാവോയിലെ സാൻ മാമെസ് സ്‌റ്റേഡിയത്തിൽ നടന്ന മത്സരത്തിൽ ഏകപക്ഷീയമായ ഒരു ​ഗോളിനായിരുന്നു ടോട്ടൻ ഹാമിന്റെ വിജയം. മത്സരത്തിന്റെ 42ാം മിനിറ്റിൽ ബ്രണ്ണൻ ജോൺസണായിരുന്നു ടോടൻഹാമിന്റെ വിജയ ​ഗോൾ നേടിയത്. 

ഇതോടെ ടോടൻഹാമിന്റെ 17 വർഷത്തെ കിരീടവരൾ‌ച്ചക്കാണ് അവസനമായത്. 2008ൽ ഇം​ഗ്ലീഷ് ഫുട്ബോൾ ലീ​ഗ് കിരീടമാണ് ടോട്ടനം അവസാനമായി നേടിയിരുന്നത്. നീണ്ട 41 വർഷത്തിന് ശേഷമാണ് ഒരു യൂറോപ്പ്യൻ ഫുട്ബോൾ കിരീടം എന്ന ടോട്ടൻഹാമിന്റെ സ്വപ്നവും ഇതോടെ സഫലമാവുകയായിരുന്നു. 1984ലെ യുവേഫ കപ്പ് കിരീടമായിരുന്നു ടോട്ടൻഹാം അവസാനമായി നേടിയത്.

നാല് സീസണുകളിലാണ് ആഞ്ചെ പോസ്റ്റെകോഗ്ലോയെ സ്പർസ്‌ പരിശീലകനായി നിയമിച്ചിരുന്നത്. എന്നാൽ കാലാവധി പൂർത്തിയാക്കുന്നതിന് ടോട്ടൻഹാം കോച്ചിനെ പുറത്താക്കുകയായിരുന്നു. ബ്രെന്റ്ഫോർഡ് പരിശീലകൻ തോമസ് ഫ്രാങ്ക് ടോട്ടൻഹാമിന്റെ പുതിയ പരിശീലകനായി ചുമതലയേൽക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. 

Tottenham Hotspur sack head coach Ange Postecoglou