ചേളാരി : സമസ്ത ലഹരി വിരുദ്ധ ക്യാമ്പയിന്റെ ഭാഗമായി മെയ് 18ന് മദ്റസകൾ മുഖേന സമാഹരിച്ച 10 ലക്ഷം പേർ ഒപ്പിട്ട ഭീമ ഹരജി ഈ മാസം 11ന് സമസ്ത നേതാക്കൾ മുഖ്യമന്ത്രിക്ക് സമർപ്പിക്കും. സംസ്ഥാനത്ത് മദ്യം, മയക്കുമരുന്ന്, മറ്റു ലഹരി വസ്തുക്കൾ എന്നിവ പൂർണമായും നിരോധിക്കണമെന്നും അവ ഉപയോഗിക്കുന്നവർക്കും വിപണനം നടത്തുന്നവർക്കുമെതിരെ കർശന നിയമ നടപടികൾ സ്വീകരിക്കണമെന്നും ആവശ്യപ്പെട്ടാണ് ഭീമ ഹരജി സമർപ്പിക്കുന്നത്. പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങളുടെ നേതൃത്വത്തിലാണ് സമസ്ത നേതാക്കൾ ഭീമ ഹരജി മുഖ്യമന്ത്രിക്ക് സമർപ്പിക്കുക.

സമസ്ത കേരള ഇസ്ലാം മത വിദ്യാഭ്യാസ ബോർഡിന്റെ ആഭിമുഖ്യത്തിൽ പ്രഖ്യാപിച്ച ലഹരി വിരുദ്ധ ക്യാമ്പയിന്റെ ഭാഗമായി പ്രത്യേക ബോധവൽക്കരണ ക്ലാസുകൾ, വിദ്യാർത്ഥി സഭകൾ, ഗൃഹസന്ദർശനം, ഡോക്യമെന്ററി പ്രകാശനം എന്നിവയും സംഘടിപ്പിച്ചുവരുന്നു.

മെയ് 18ന് പതിനായിരത്തിൽ പരം മദ്റസകളിൽ നടന്ന സ്പെഷ്യൽ അസംബ്ലിയിൽ 12 ലക്ഷത്തോളം വിദ്യാർത്ഥികൾ അണി ചേർന്ന് ലഹരിക്കെതിരെ പ്രതിജ്ഞ എടുത്തിരുന്നു. സമസ്തയുടെയും പോഷക സംഘടനകളുടെയും നേതൃത്വത്തിൽ ലഹരിക്കെതിരെ വിത്യസ്ഥ പരിപാടികളും സംഘടിപ്പിച്ചുവരുന്നു.