ജിസിസി രാജ്യങ്ങളിൽ ജനസംഖ്യയിൽ മുന്നിൽ നിൽക്കുന്നത് ഈ രാജ്യം; ഏറ്റവും കുറവ് ജനസംഖ്യ ബഹ്റൈനിൽ

ഗൾഫ് കോ-ഓപ്പറേഷൻ കൗൺസിൽ (ജിസിസി) രാജ്യങ്ങളിൽ ജനസംഖ്യയിൽ മുന്നിൽ നിൽക്കുന്നത് സഊദി അറേബ്യയാണ്. ഏറ്റവും കുറവ് ജനസംഖ്യയുള്ളത് ബഹ്റൈനിലും. 2023-ലെ കണക്കനുസരിച്ച്, ജിസിസി രാജ്യങ്ങളുടെ (സൗദി അറേബ്യ, യുണൈറ്റഡ് അറബ് എമിറേറ്റ്സ്, ഖത്തർ, കുവൈത്ത്, ഒമാൻ, ബഹ്റൈൻ) മൊത്തം ജനസംഖ്യ 57.6 മില്യൺ ആണ്. 2021-നെ അപേക്ഷിച്ച് ഇതിൽ 7.3% വർധനവാണ് രേഖപ്പെടുത്തിയിട്ടുള്ളത്.

സഊദി അറേബ്യ
ജിസിസി രാജ്യങ്ങളിൽ ഏറ്റവും ജനസംഖ്യയുള്ള രാജ്യമാണ് സഊദി അറേബ്യ. 2022-ൽ 32.2 മില്യണായിരുന്നു സഊദിയിലെ ജനസംഖ്യ. 2021-ലെ 30.8 മില്യണിൽ നിന്ന് 4.5% വർധനവാണ് ഒരു വർഷം കൊണ്ട് ഉണ്ടായത്.  

ഉയർന്ന ജനനനിരക്ക്, പ്രവാസി ജനസംഖ്യയുടെ വർധന, സാമ്പത്തിക വികസനം എന്നിവയാണ് ഈ വളർച്ചക്കു പിന്നിലെ പ്രധാന കാരണം. രാജ്യത്ത് 58.4% സഊദി പൗരന്മാരും 41.6% പ്രവാസികളുമാണ്. യുവജനസംഖ്യ (50%-ലധികം 25 വയസ്സിന് താഴെയുള്ളവർ) സഊദിയുടെ ജനസംഖ്യാ ഘടനയെ വ്യത്യസ്തമാക്കുന്നു.

യുണൈറ്റഡ് അറബ് എമിറേറ്റ്സ് (യുഎഇ)
ജിസി രാജ്യങ്ങൾക്കിടയിലെ ജനസംഖ്യയുടെ കാര്യത്തിൽ 10.7 മില്യൺ ജനസംഖ്യയുമായി രണ്ടാം സ്ഥാനത്താണ് യുഎഇ. 2021-ലെ 9.9 മില്യണിൽ നിന്ന് 8.3% വർധനവാണ് രണ്ടു വർഷം കൊണ്ട് യുഎഇ ജനസംഖ്യയിൽ രേഖപ്പെടുത്തിയത്. പ്രവാസികളാണ് രാജ്യത്ത് ഭൂരിപക്ഷവും. മാത്രമല്ല ദുബൈ, അബൂദബി പോലുള്ള നഗരങ്ങൾ സാമ്പത്തിക കേന്ദ്രങ്ങളായി മാറിയതാണ് ഈ വളർച്ചയ്ക്ക് കാരണം.

ഒമാൻ 
5.2 മില്യൺ ജനസംഖ്യയോടെ പട്ടികയിൽ മൂന്നാം സ്ഥാനത്താണ് ഒമാൻ. 2021-ലെ 4.5 മില്യണിൽ നിന്ന് 14.1% വർധനവാണ് ഒമാൻ രേഖപ്പെടുത്തിയത്. ഒമാന്റെ ജനസംഖ്യയിൽ യുവജനങ്ങളാണ് ഭൂരിപക്ഷവും.

കുവൈത്ത്
2023 ലെ കണക്കു പ്രകാരം 4.9 മില്യണാണ് കുവൈത്തിലെ ജനസംഖ്യ. 2021ൽ ഇത് 4.2 മില്യണായിരുന്നു. പ്രവാസികളുടെ എണ്ണത്തിലുണ്ടായ വർധനവാണ് കുവൈത്തിലെ ജനസംഖ്യ ഉയരാനുള്ള പ്രധാന കാരണം.  

ഖത്തർ
2023ൽ 3.1 മില്യണായിരുന്നു ഖത്തറിലെ ജനസംഖ്യ. 2021-ൽ ഇത് 2.7 മില്യണായിരുന്നു. കേവലം രണ്ടുവർഷം കൊണ്ട് 11.5% വർധനവാണ് ഖത്തറിലെ ജനസംഖ്യയിൽ സംഭവിച്ചത്. 

ബഹ്റൈൻ 
ജിസിസി രാജ്യങ്ങളിൽ ഏറ്റവും കുറവ് ജനസംഖ്യയുള്ള രാജ്യമാണ് ബഹ്റൈൻ, 2023-ൽ 1.6 മില്യൺ ആയിരുന്നു രാജ്യത്തെ ജനസംഖ്യ. 2021-ലുണ്ടായിരുന്ന 1.5 മില്യണിൽ നിന്ന് 4.8% വർധനവാണ് 2 വർഷം കൊണ്ട് രേഖപ്പെടുത്തിയത്. രാജ്യത്ത് 47.44%വും ബഹ്റൈൻ പൗരന്മാരും 52.56% പ്രവാസികളുമാണ്. ബഹ്റൈന്റെ ചെറിയ ഭൂവിസ്തൃതി (760 ച.കി.മീ.) ജനസംഖ്യാ വളർച്ചയെ പരിമിതപ്പെടുത്തുന്നു. എന്നിരുന്നാലും, ഉയർന്ന ജനനനിരക്കും (1990-98 കാലഘട്ടത്തിൽ 3%) പ്രവാസി വരവും ബഹ്റൈന്റെ ജനസംഖ്യയെ ഇന്നു കാണുന്ന വിധത്തിൽ ത്വരിതപ്പെടുത്തിയത്.

ജിസിസി രാജ്യങ്ങളിൽ പ്രവാസികളുടെ സാന്നിധ്യം ജനസംഖ്യാ വളർച്ചയിൽ നിർണായക പങ്ക് വഹിക്കുന്നു. എന്നാൽ, ഫെർട്ടിലിറ്റി നിരക്ക് കുറയുന്നതും (1980-2021 കാലഘട്ടത്തിൽ യുഎഇയിൽ 75.5% കുറവ്) ജനസംഖ്യാ ഘടനയെ മാറ്റിമറിക്കുന്നു.