ന്യൂഡല്‍ഹി: വിദ്വേഷ പ്രസംഗ കേസില്‍ അലഹബാദ് ഹൈക്കോടതിയിലെ ജഡ്ജി ജസ്റ്റിസ് ശേഖര്‍ കുമാര്‍ യാദവിനെതിരായ അന്വേഷണം ഉപേക്ഷിച്ച് സുപ്രിം കോടതി.  രാജ്യസഭാ സെക്രട്ടറിയേറ്റിന്റെ കത്തിനെ തുടര്‍ന്നാണ് അന്വേഷണത്തില്‍ നിന്ന് സുപ്രിംകോടതി പിന്‍വാങ്ങിയതെന്നാണ് റിപ്പോര്‍ട്ട്. അന്വേഷണസമിതി രുപീകരിക്കാനുള്ള അധികാരം പാര്‍ലമെന്റിനാണെന്നാണ് കത്തില്‍ വാദിക്കുന്നത്.

കഴിഞ്ഞ വര്‍ഷം ഡിസംബര്‍ എട്ടിന് വിശ്വഹിന്ദു പരിഷത്ത് സംഘടിപ്പിച്ച പരിപാടിയിലായിരുന്നു ജസ്റ്റിസ് ശേഖര്‍ കുമാര്‍ യാദവിന്റെ വിദ്വേഷ പ്രസംഗം. ഏക സിവില്‍ കോഡ് സംബന്ധിച്ചായിരുന്നു പരിപാടി. ഏകസിവില്‍കോഡ് നടപ്പിലാക്കുമെന്ന് ഉറപ്പിച്ചു പറഞ്ഞ ജഡ്ജി ഭൂരിപക്ഷത്തിന്റെ ആഗ്രഹപ്രകാരം ഇന്ത്യ ഭരിക്കപ്പെടുമെന്നും അന്നത്തെ പ്രസംഗത്തില്‍ ചൂണ്ടിക്കാട്ടി. 

ഇതിന് പിന്നാലെ നിരവധി സംഘടനകള്‍ സുപ്രിംകോടതി ചീഫ് ജസ്റ്റിസിന് കത്തെഴുതുകയും രാഷ്ട്രപതിക്ക് പരാതി നല്‍കുകയും ചെയ്തിരുന്നു. യാദവിന്റെ പ്രസംഗം മാധ്യമ വാര്‍ത്തകളിലൂടെ ശ്രദ്ധയില്‍പ്പെട്ടതിന്റെ അടിസ്ഥാനത്തില്‍ അലഹബാദ് ഹൈക്കോടതിയോട് സുപ്രിംകോടതി വിശദീകരണം തേടി. റിപ്പോര്‍ട്ട് ജസ്റ്റിസ് യാദവിന് എതിരായിരുന്നതിനാല്‍ സുപ്രിം കോടതിയുടെ ആഭ്യന്തര അന്വേഷണത്തിന് ചീഫ് ജസ്റ്റിസ് സഞ്ജീവ് ഖന്ന തീരുമാനിക്കുകയായിരുന്നു.

എന്നാല്‍ ജഡ്ജിമാര്‍ക്ക് എതിരെ നടപടി എടുക്കാനുള്ള അധികാരം രാജ്യസഭാ ചെയര്‍മാനും, പാര്‍ലമെന്റിനും മാത്രമേ ഉള്ളു എന്ന് വ്യക്തമാക്കി രാജ്യസഭാ സെക്രട്ടറിയേറ്റ് സുപ്രിംകോടതിക്ക് കത്ത് നല്‍കി. മാര്‍ച്ച് മാസമാണ് ഈ കത്ത് സുപ്രിംകോടതി സെക്രട്ടറി ജനറലിന് ലഭിച്ചത്. തുടര്‍ന്ന് ജസ്റ്റിസ് ശേഖര്‍ കുമാര്‍ യാദവിന് എതിരായ ആഭ്യന്തര അന്വേഷണത്തിനുള്ള നടപടികള്‍ ഉപേക്ഷിക്കാന്‍ സുപ്രിംകോടതി തീരുമാനിക്കുകയായിരുന്നു.