തെല്‍അവീവ്: കാലാവസ്ഥാ ആക്ടിവിസ്റ്റ് ഗ്രെറ്റ തന്‍ബര്‍ഗ് ഉള്‍പ്പെടെ 12 ആക്ടിവിസ്റ്റുകളുടെ നേതൃത്വത്തില്‍ ഗസ്സയ്ക്കു സഹായ വസ്തുക്കളുമായി പുറപ്പെട്ട മദ്ലീന്‍ കപ്പല്‍ ഇസ്റാഈല്‍ തടഞ്ഞിരിക്കുകയാണ് ഇസ്‌റാഈല്‍. കപ്പലുമായുള്ള ആശയ വിനിമയം നഷ്ടപ്പെട്ട നിലയിലാണ്. 
മാദ്ലീനുമായുള്ള ബന്ധം നഷ്ടപ്പെട്ടതായി ഇന്റര്‍നാഷണല്‍ സോളിഡാരിറ്റി മൂവ്മെന്റ് സഹസ്ഥാപക ഹുവൈദ അറഫ് സ്ഥിരീകരിക്കുന്നു.

അന്താരാഷ്ട്ര ജലാശയത്തില്‍വച്ചാണ് ഇസ്‌റാഈലി കമാന്‍ഡോകള്‍ കപ്പല്‍ തടഞ്ഞത്. കപ്പലിലുള്ള എല്ലാവരും അവരുടെ ഫോണുകള്‍ ഓഫ് ചെയ്യണമെന്ന് കമാന്‍ഡോകള്‍ ആവശ്യപ്പെട്ടു. ആദ്യം സൈറണ്‍ മുഴങ്ങുന്നത് കേട്ടു. പിന്നീട് ഇസ്‌റാഈല്‍ യുദ്ധക്കപ്പലുകള്‍ മദ്‌ലീനെ വളഞ്ഞു. അതേസമയം മുകലില്‍ വട്ടമിട്ടു പറഞ്ഞ ഇസ്‌റാഈല്‍ ഡ്രോണില്‍ നിന്ന് മദ്‌ലീനിലെ യാത്രികര്‍ക്കു മേല്‍ വെളുത്ത വസ്തു സ്‌പ്രേ ചെയ്തു. 
കണ്ണുകളില്‍ എരിച്ചിലും അസ്വസ്ഥതയുമുണ്ടാക്കുന്നതായിരുന്നു അതെന്ന് റിപ്പോര്‍ട്ടുകള്‍ വ്യക്തമാക്കുന്നു. 

ഇസ്‌റാഈല്‍ സൈന്യം കപ്പല്‍ തടയുന്നതിന് തൊട്ടു മുമ്പുള്ള നിമിഷങ്ങള്‍ ജീവനക്കാരുടെ വീഡിയോ ഫ്രീഡം ഫ്ളോട്ടില്ല കോയിലിഷന്‍ പങ്കിട്ടിരുന്നു. ജീവനക്കാര്‍ ലൈഫ് ജാക്കറ്റുകള്‍ ധരിച്ച് കൈകള്‍ ഉയര്‍ത്തിപ്പിടിച്ച് ഫോണുകള്‍ വെള്ളത്തിലേക്ക് എറിയുന്നതാണ് ദൃശ്യങ്ങളിലുള്ളത്.

സയണിസ്റ്റ് സൈന്യം കഴിഞ്ഞ 20 മാസത്തിലേറെയായി തുടരുന്ന ആക്രമണത്തിലും ഉപരോധത്തിലും ദുരിതത്തിലായ ഫലസ്തീനികള്‍ക്ക് അവശ്യ വസ്തുക്കലുമായാണ് കപ്പല്‍ പുറപ്പെട്ടത്. ഇസ്റാഈലിന്റെ സമുദ്ര അതിര്‍ത്തിയില്‍ കപ്പല്‍ തടയുമെന്നും അവര്‍ക്ക് ഗസ്സയിലേക്ക് എത്താനാകില്ലെന്നും ഇസ്റാഈല്‍ യുദ്ധമന്ത്രി ഇസ്റായേല്‍ കട്സ് ഇന്നലെ ഭീഷണിമുഴക്കിയിരുന്നു. കപ്പല്‍ ഗസ്സയിലേക്ക് എത്താന്‍ അനുവദിക്കരുതെന്നും തടയണമെന്നും താന്‍ സൈന്യത്തിന് നിര്‍ദേശം നല്‍കിയതായും കട്‌സ് പറഞ്ഞു. ഗ്രെറ്റയും സംഘവും തിരികെ പോകണമെന്നും  ആവശ്യപ്പെട്ടിരുന്നു.

ALSO READ: ഗസ്സയിലേക്കുള്ള 'മദ്‌ലീന്‍' സഹായക്കപ്പല്‍ ഇസ്‌റാഈല്‍ തടഞ്ഞു; കപ്പലുമായുള്ള ആശയവിനിമയം നഷ്ടപ്പെട്ടു

ഹമാസിന് ആയുധങ്ങള്‍ നല്‍കാനാണ് സംഘം എത്തിയിരിക്കുന്നതെന്നാണ് ഇസ്റാഈലിന്റെ ആരോപണം. രണ്ടാം വെടിനിര്‍ത്തല്‍ ഇസ്റാഈല്‍ ലംഘിച്ച ശേഷം രണ്ടരമാസമായി ഗസ്സയിലേക്ക് സഹായം തടയുന്ന സയണിസ്റ്റുകളുടെ നടപടിയില്‍ പ്രതിഷേധിച്ചാണ് കപ്പലില്‍ സഹായ വസ്തുക്കളുമായി സംഘം ഗസ്സയിലേക്ക് പുറപ്പെട്ടത്. ഒടുവില്‍ വിവരം ലഭിക്കുമ്പോള്‍ ഫ്രീഡം ഫ്ളോട്ടില്ല കോയിലേഷന്‍ എന്നു പേരിട്ട യാത്രയുടെ ഭാഗമായ മദ്‌ലീന്‍ കപ്പല്‍ ഗസ്സയില്‍ നിന്ന് 160 നോട്ടിക്കല്‍ മൈല്‍ അകലെയാണുള്ളത്. കഴിഞ്ഞ മാസവും ഫ്രീഡം ഫ്ളോട്ടിയയുടെ ഭാഗമായ കപ്പല്‍ ഇസ്റാഈല്‍ രണ്ട് ഡ്രോണുകള്‍ ഉപയോഗിച്ച് തകര്‍ത്തിരുന്നു.

അതിനിടെ, മാദ്‌ലീന്‍ കപ്പല്‍ നിലവില്‍ അഷ്ഡോഡ് തുറമുഖത്തേക്ക് കൊണ്ടുപോയതായി ഒരു സൈനിക വൃത്തത്തെ ഉദ്ധരിച്ച് ഇസ്‌റാഈല്‍ അധിനിവേശ സൈന്യത്തിന്റെ റേഡിയോ റിപ്പോര്‍ട്ട് ചെയ്യുന്നു. അഷ്ഡോഡ് തുറമുഖത്തെ ഒരു നാവിക താവളത്തില്‍ വെച്ച് ചോദ്യം ചെയ്യലിനായി കപ്പലിലുള്ള വ്യക്തികളുടെ ഐഡന്റിറ്റി പരിശോധിച്ചു വരികയാണെന്നും സ്രോതസ്സ് കൂട്ടിച്ചേര്‍ത്തു.

An aid ship bound for Gaza carrying Greta Thunberg and other activists has been intercepted by Israeli forces in international waters.