മുംബൈ: മുംബൈയിൽ അതിവേഗ ലോക്കൽ ട്രെയിനിൽ നിന്ന് വീണ് അഞ്ച് പേർ മരിച്ചു. ട്രെയിനിലെ അമിതമായ തിരക്ക് മൂലമാണ് സംഭവം എന്നാണ് പ്രാഥമിക റിപ്പോർട്ട്. റിപ്പോർട്ടുകൾ പ്രകാരം ഏകദേശം 10 മുതൽ 12 വരെ യാത്രക്കാർ ലോക്കൽ ട്രെയിനിൽ നിന്ന് താഴേക്ക് വീണു. ഇവരിൽ അഞ്ച് പേർ മരിക്കുകയും ബാക്കിയുള്ളവർക്ക് പരുക്കേൽക്കുകയും ചെയ്തിട്ടുണ്ട്. പരുക്കേറ്റ എല്ലാവരെയും ആശുപത്രിയിൽ പ്രവേശിപ്പിച്ചു. ഛത്രപതി ശിവാജി മഹാരാജ് ടെർമിനസിലേക്ക് പോകുകയായിരുന്ന ട്രെയിനിൽ മുംബ്ര സ്റ്റേഷനിലാണ് സംഭവം.

ട്രെയിനിലെ അമിതമായ തിരക്കാണ് അപകടത്തിന് കാരണമെന്ന് കരുതുന്നു. ആളുകൾ ട്രെയിനിൽ തൂങ്ങിക്കിടന്നാണ് യാത്ര ചെയ്തിരുന്നതെന്നും റിപ്പോർട്ടുകളുണ്ട്. അപകടമുണ്ടായ ഉടനെ തന്നെ റെയിൽവേ അധികൃതരും പൊലിസും സ്ഥലത്തെത്തി. പരിക്കേറ്റവരെ ഉടൻ തന്നെ അടുത്തുള്ള ആശുപത്രിയിലേക്ക് കൊണ്ടുപോയി. അപകടത്തെക്കുറിച്ച് അന്വേഷണം ആരംഭിച്ചു. സംഭവം പ്രാദേശിക സേവനങ്ങളെയും ബാധിച്ചതായി  താനെ ജിആർപിയിലെ സീനിയർ പൊലിസ് ഇൻസ്പെക്ടർ അർച്ചന ദുസാനെ പറഞ്ഞു.

ALSO READ: സോറി.. ശരിക്കുള്ള 'കാലവർഷ' മഴ പെയ്തിട്ടില്ല; ജൂൺ ആദ്യവാരം പിന്നിടുമ്പോൾ 67 ശതമാനം മഴകുറവ്

തിരക്കേറിയ ട്രെയിനിൽ നിന്ന് ചില യാത്രക്കാർ വീണുവെന്നും ആ സമയത്ത് ഒരു മെയിൽ/എക്സ്പ്രസ് ട്രെയിൻ തൊട്ടടുത്ത ട്രാക്കിലൂടെ കടന്നുപോകുകയായിരുന്നുവെന്നും ആളുകൾ പറഞ്ഞു. രാവിലെ 9.30 ഓടെ കസാരയിലേക്ക് പോകുന്ന ട്രെയിനിലെ ഗാർഡ് ട്രാക്കുകളിൽ പരിക്കേറ്റ യാത്രക്കാരെ കണ്ടതായി കൺട്രോൾ റൂമിൽ അറിയിച്ചതായി സെൻട്രൽ റെയിൽവേയുടെ ചീഫ് പബ്ലിക് റിലേഷൻസ് ഓഫീസർ സ്വപ്‌നിൽ നില പറഞ്ഞു.

മുംബ്ര സ്റ്റേഷൻ മുംബൈയുടെ പ്രാന്തപ്രദേശത്താണ് സ്ഥിതി ചെയ്യുന്നതെങ്കിലും, ഏറ്റവും തിരക്കേറിയ സ്റ്റേഷനുകളിൽ ഒന്നായാണ് കണക്കാക്കപ്പെടുന്നത്. അതേസമയം, അപകടത്തിന്റെ യഥാർത്ഥ കാരണം ഇപ്പോഴും വ്യക്തമല്ലെന്ന് മറ്റൊരു ഉദ്യോഗസ്ഥൻ പറഞ്ഞു. സംഭവത്തിൽ അന്വേഷണം പുരോഗമിക്കുകയാണ്.