റിയാദ്: ഗസ്സയിലെ ഇസ്റാഈൽ തുടർന്നുകൊണ്ടിരിക്കുന്ന വംശഹത്യ അവസാനിപ്പിക്കാൻ അന്താരാഷ്ട്ര സമൂഹം ഇടപെടണമെന്നു സഊദി അറേബ്യ കിരീടാവകാശി മുഹമ്മദ് ബിൻ സൽമാൻ ആവശ്യപ്പെട്ടു. ശനിയാഴ്ച മിനാ പാലസിലെ റോയൽ കോർട്ടിൽ ഈ വർഷത്തെ ഹജ്ജ് നിർവഹിക്കാനെത്തിയ രാഷ്ട്രത്തലവന്മാർ, വിശിഷ്ട വ്യക്തികൾ എന്നിവർക്കുള്ള സ്വീകരണത്തെ അഭിസംബോധന ചെയ്തുകൊണ്ട് സംസാരിക്കവെ ആണ്, ഗസ്സയിലെ ഇസ്രായേൽ ആക്രമണങ്ങൾ അവസാനിപ്പിക്കുന്നതിൽ അന്താരാഷ്ട്ര സമൂഹത്തിന്റെ പങ്ക് സൗദി കിരീടാവകാശി എടുത്തു പറഞ്ഞത്.

 ഇസ്രായേൽ ആക്രമണത്തിന്റെ ഫലമായി ഫലസ്തീനിലെ നമ്മുടെ സഹോദരങ്ങൾ ഇപ്പോഴും ദുരിതമനുഭവിക്കുന്നതിനിടെയാണ് അനുഗ്രഹീതമായ ബലി പെരുന്നാൾ വരുന്നത്. ആക്രമണങ്ങൾ അവസാനിപ്പിക്കുന്നതിലും നിരപരാധികളായ സാധാരണക്കാരെ സംരക്ഷിക്കുന്നതിലും അന്താരാഷ്ട്ര പ്രമേയങ്ങൾക്ക് അനുസൃതമായി ഫലസ്തീനിൽ സമാധാനം പുനസ്ഥാപിക്കുന്നതിലും അന്താരാഷ്ട്ര സമൂഹത്തിന്റെ പങ്ക് ഞങ്ങൾ വിലമതിക്കുന്നു - അദ്ദേഹം പറഞ്ഞു. ബലി പെരുന്നാള് ദിനത്തിലും സയണിസ്റ്റ് രാജ്യം കൂട്ടക്കൊല നടത്തിവരുന്നതിനിടെ ആണ് മുഹമ്മദ് ബിൻ സൽമാൻ്റെ പ്രസ്താവന. 

Saudi Crown Prince calls on international community to end Israeli aggression on Gaza