സൂറിച്ച്: യൂറോപ്യൻ ഫുട്‌ബോളിന്റെ കരുത്തന്മാർ നേർക്കുനേർ. യുവേഫ നേഷൻസ് ലീഗ് ചാമ്പ്യൻമാർ നാളെ തീരുമാനമാകും. ഫൈനലിൽ പോർച്ചുഗലും സ്‌പെയിനും ഏറ്റുമുട്ടും. ഇന്ത്യൻ സമയം രാത്രി 12.30ന് മത്സരം ആരംഭിക്കും. അതേ സമയം, മൂന്നാം സ്ഥാനം നേടാനായി ലൂസേഴ്‌സ് ഫൈനലിൽ ഫ്രാൻസും ജർമനിയും വൈകിട്ട് 6.30ന് കളത്തിലിറങ്ങും.

സെമിഫൈനലിൽ ഫ്രാൻസിനെ തകർത്ത് വലിയ ആത്മവിശ്വാസത്തിലാണ് സ്‌പെയിൻ ഫൈനലിൽ എത്തുന്നത്. ലാമിൻ യമാൽ, നിക്കോ വില്യംസ്, പെഡ്രി തുടങ്ങിയ യുവതാരങ്ങൾ സജീവമായ സ്‌പാനിഷ് നിര യൂറോ കപ്പിന് പിന്നാലെ നേഷൻസ് ലീഗും സ്വന്തമാക്കാൻ ഒരുങ്ങുകയാണ്.

ജർമനിക്ക് എതിരെ സെമിയിൽ പോർച്ചുഗൽ ഒന്നിനെതിരെ രണ്ടു ​ഗോളുകൾക്കാണ് വിജയം സ്വന്തമാക്കിയത് . പോർച്ചുഗീസ് നായകൻ വർഷങ്ങൾക്കിപ്പുറവും കരുത്തുറ്റ പ്രകടനവുമായി മുന്നേറുകയാണ്, ക്രിസ്റ്റിയാനോ റൊണാൾഡോയുടെ നാല്പതാം വയസ്സിലും ഗോൾ വേട്ട തുടരുന്നത് പോർച്ചുഗലിന് വലിയ പ്രതീക്ഷയാണ്.

പോർച്ചുഗലിനെതിരെ ചരിത്രപരമായി സ്‌പെയിന് വ്യക്തമായ ആധിപത്യമുണ്ട്. നേരത്തെ നടന്ന 40 മത്സരങ്ങളിൽ 18 ജയം സ്‌പെയിനിന്; പോർച്ചുഗലിന് ആറ് ജയം മാത്രമാണ്. 16 മത്സരങ്ങൾ സമനിലയിൽ അവസാനിച്ചു.

ഫൈനലിന് മുന്നോടിയായി സ്‌പാനിഷ് പരിശീലകൻ ലൂയിസ് ഡി ലാ ഫ്യൂവന്റെക്ക് പ്രതിരോധ പാളിച്ചകൾ പരിഹരിക്കേണ്ടതുണ്ട്. സെമിയിൽ ഫ്രാൻസിനെതിരെ 4-0ന് മുന്നിലായിട്ടും നാലു ഗോളുകൾ വഴങ്ങിരുന്നു.

മത്സര തിയതിയും സമയവും

• ഫൈനൽ: പോർച്ചുഗൽ vs സ്‌പെയിൻ – ജൂൺ 9 രാത്രി 12.30 (IST)

• മൂന്നാം സ്ഥാനം: ഫ്രാൻസ് vs ജർമനി – ജൂൺ 9 വൈകിട്ട് 6.30 (IST)

Cristiano Ronaldo’s Portugal to clash with Spain in UEFA Nations League final. France and Germany to battle for third place. Full match schedule and details.