ഇംഫാല്‍:മണിപ്പൂരിൽ വീണ്ടും വൻ സംഘർഷം. സംസ്ഥാനത്തിന്റെ വിവിധ ജില്ലകളിൽ ഇന്റര്‍നെറ്റ് സേവനങ്ങള്‍ അടിയന്തരമായി റദ്ദാക്കി. ഇംഫാല്‍ ഈസ്റ്റ്, ഇംഫാല്‍ വെസ്റ്റ്, ബിഷ്ണുപുര്‍, ഥൗബല്‍, കാചിങ് ജില്ലകളിലാണ് അടുത്ത അഞ്ച് ദിവസത്തേക്ക് മൊബൈല്‍ ഇന്റര്‍നെറ്റ് സേവനങ്ങള്‍ നിരോധിച്ചതെന്ന് അധികൃതര്‍ അറിയിച്ചു. ശനിയാഴ്ച രാത്രി 11.45ന് തുടങ്ങിയ വിലക്ക് അടുത്ത ഉത്തരവുണ്ടാകുന്നതുവരെ തുടരും.

ബിഷ്ണുപൂര്‍ ജില്ലയില്‍ കര്‍ഫ്യൂ പ്രഖ്യാപിച്ചതും സംഘര്‍ഷഭീതിയേ തുടർന്നാണ്. ഇംഫാല്‍ ഈസ്റ്റ്, ഇംഫാല്‍ വെസ്റ്റ്, ഥൗബല്‍, കാചിങ് ജില്ലകളിലും നിരോധനാജ്ഞ പുറപ്പെടുവിച്ചിട്ടുണ്ട്.

സംഘര്‍ഷത്തിന് കാരണം

മെയ്തെയ് വിഭാഗവുമായി ബന്ധപ്പെട്ട ആരംഭായ് തെങ്കോല്‍ സംഘടനയുടെ നേതാവ് കനാന്‍ സിങ്ങിനെ പൊലീസ് അറസ്റ്റ് ചെയ്തതിനെത്തുടര്‍ന്നാണ് പ്രശ്‌നങ്ങള്‍ തുടക്കം കുറിക്കുന്നത്. അദ്ദേഹത്തെ വിട്ടയയ്ക്കണമെന്നാവശ്യപ്പെട്ട് വലിയ പ്രതിഷേധം ഉണ്ടായി. ഈ പ്രതിഷേധം അക്രമത്തിലേക്ക് വഴിമാറിയതോടെ ടെലികമ്മ്യൂണിക്കേഷന്‍ നിയന്ത്രണം അടിയന്തിരമായി നടപ്പാക്കി.

ഇംഫാലില്‍ പ്രതിഷേധക്കാര്‍ റോഡുകളില്‍ ഇറങ്ങി ടയറുകള്‍ കത്തിച്ചു. സംഘര്‍ഷം സമൂഹമാധ്യമങ്ങളില്‍ വംശീയ വിദ്വേഷ പരാമര്‍ശങ്ങളും ചിത്രങ്ങളും പ്രചരിപ്പിക്കാനുള്ള ശ്രമങ്ങൾ വഴി അതീവ ഗുരുതരമായ ക്രമസമാധാന പ്രശ്നങ്ങള്‍ക്ക് വഴിവച്ചേക്കാമെന്ന് ആഭ്യന്തര സെക്രട്ടറി എന്‍ അശോക് കുമാര്‍ പറഞ്ഞു. ഇതാണ് ഇന്റര്‍നെറ്റ് നിരോധനത്തിന് കാരണം.

2023-ലെ സ്നൈപ്പര്‍ വെടിവെപ്പു കേസുമായി ബന്ധപ്പെട്ട് കുക്കി വിഭാഗത്തില്‍പ്പെട്ട ഒരാളെ പൊലിസ് അറസ്റ്റ് ചെയ്തതിനെതിരെ കുക്കികളും പ്രതിഷേധം സംഘടിപ്പിച്ചിരുന്നു. മറുവശത്ത് കുക്കി സംഘടനാ നേതാക്കളെ അറസ്റ്റ് ചെയ്യണമെന്ന ആവശ്യവുമായും മെയ്തെയ് വിഭാഗം രംഗത്തെത്തിയിട്ടുണ്ട്.മണിപ്പൂരില്‍ ക്രമസമാധാന നില വീണ്ടും ഗുരുതരമാകുന്ന പശ്ചാത്തലത്തിലാണ് അധികൃതരുടെ പുതിയ നടപടികള്‍. 

Clashes have erupted again in Manipur following the arrest of a Meitei group leader. In response, internet services have been suspended for five days in five districts including Imphal East and West. Curfew has been imposed in Bishnupur, and prohibitory orders are in place in other districts to prevent the spread of violence.