പത്തനംതിട്ട: വീടിന്റെ നിർമാണം പറഞ്ഞ സമയത്ത് പൂർത്തിയാക്കാത്തതിന് കൊച്ചി പാലാരിവട്ടം ആസ്ഥാനമായി പ്രവർത്തിക്കുന്ന ഡി & ഡി കൺസ്ട്രക്ഷൻ ഗ്രൂപ്പിന് 19.34 ലക്ഷം രൂപ നഷ്ടപരിഹാരം നൽകാൻ പത്തനംതിട്ട ഉപഭോക്തൃ തർക്കപരിഹാര കമ്മീഷൻ വിധിച്ചു. കമ്പനി ഉടമകളായ ജോസഫ് ഡാജുവും ഭാര്യ ഡാളിമോളും ചേർന്നാണ് ഈ തുക പരാതിക്കാർക്ക് നൽകേണ്ടത്.

പത്തനംതിട്ട അഴൂരിൽ താമസിക്കുന്ന ബംഗ്ലാവ് വീട്ടിൽ മഹേഷും ഭാര്യ ഹിമയും 2019 മാർച്ചിൽ പ്രമാടത്ത് വീട് നിർമിക്കാൻ ഡി & ഡി കമ്പനിയുമായി കരാർ ഉണ്ടാക്കിയിരുന്നു. 2020 ഫെബ്രുവരി 5-നകം പണി പൂർത്തിയാക്കാമെന്നായിരുന്നു വാഗ്ദാനം. ഇതിനായി 26.76 ലക്ഷം രൂപ കമ്പനിക്ക് നൽകിയെങ്കിലും, നിർമാണം സമയബന്ധിതമായോ കൃത്യമായോ പൂർത്തിയാക്കിയില്ലെന്ന് പരാതിക്കാർ ആരോപിച്ചു.

ഇരുകക്ഷികളുടെയും വാദങ്ങൾ പരിശോധിച്ച കമ്മീഷൻ, വീടിന്റെ നിർമാണം വിലയിരുത്താൻ ഒരു എൻജിനീയറെ വിദഗ്ധ കമ്മീഷണറായി നിയോഗിച്ചു. റിപ്പോർട്ട് പ്രകാരം, 14.94 ലക്ഷം രൂപയുടെ ജോലി മാത്രമാണ് കമ്പനി നിർവഹിച്ചത്. മനഃപൂർവം പണി വൈകിപ്പിച്ചതായും കമ്മീഷൻ കണ്ടെത്തി.

അധികമായി വാങ്ങിയ 11.81 ലക്ഷം രൂപ 7.5% പലിശയോടെ തിരികെ നൽകാനും, 7.5 ലക്ഷം രൂപ നഷ്ടപരിഹാരമായും, 30,000 രൂപ കോടതി ചെലവിനുമായി മൊത്തം 19,34,200 രൂപ നൽകാൻ കമ്മീഷൻ പ്രസിഡന്റ് ബേബിച്ചൻ വെച്ചൂച്ചിറയും അംഗം നിഷാദ് തങ്കപ്പനും വിധിക്കുകയായിരുന്നു.