ഇതിഹാസതാരം ക്രിസ്റ്റ്യാനോ റൊണാൾഡോ തന്റെ നാല്പതാം വയസ്സിലും പ്രായത്തെ പോലും വെല്ലുന്ന പോരാട്ടവീര്യമാണ് നടത്തിക്കൊണ്ടിരിക്കുന്നത്. ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഇപ്പോൾ ഫുട്ബോളിൽ നിന്നും എപ്പോൾ വിരമിക്കുന്ന ചോദ്യത്തിന് മറുപടി നൽകിയിരിക്കുകയാണ് റൊണാൾഡോ. ഭാവിയെക്കുറിച്ച് അധികം ചിന്തിക്കുന്നില്ലെന്നും ഇപ്പോഴുള്ള നിമിഷങ്ങൾ ആസ്വദിക്കുകയാണെന്നുമാണ് റൊണാൾഡോ പറഞ്ഞത്. ഓജോകോക്ക് നൽകിയ അഭിമുഖത്തിലാണ് റൊണാൾഡോ ഇക്കാര്യം പറഞ്ഞത്. 

''എന്റെ ജീവിതത്തിൽ ഞാൻ നടപ്പിലാക്കിയ ഒരു കാര്യം എന്തെന്നാൽ വർത്തമാനകാലത്ത് ജീവിക്കുക എന്നതാണ്. ഭാവിയെക്കുറിച്ച് അധികം ചിന്തിക്കാതിരിക്കുക. അതാണ് ഞാൻ എന്റെ ജീവിതത്തിൽ പിന്തുടർന്ന് കൊണ്ടിരിക്കുന്നത്. ഞാൻ ഇത് വളരെയധികം ആസ്വദിക്കുന്നു. ഫുട്ബോളിൽ എനിക്ക് ഇനി അധികം വർഷങ്ങളില്ല. കളി നിർത്താനുള്ള ഒരു സമയപരിധി നിശ്ചയിക്കുന്നതിനെക്കുറിച്ച് എനിക്കറിയില്ല. കാരണം നാളെ ഞാൻ എഴുന്നേറ്റ് എനിക്ക് ഇനി കളിക്കാൻ തോന്നുന്നില്ലെന്ന് പറഞ്ഞേക്കാം. എന്നാൽ ഇപ്പോൾ എനിക്ക് അങ്ങനെ തോന്നുന്നില്ല'' റൊണാൾഡോ പറഞ്ഞു. 

നിലവിൽ യുവേഫ നേഷൻസ് ലീഗിന്റെ ഫൈനൽ മത്സരത്തിന് തയ്യാറെടുക്കുകയാണ് റൊണാൾഡോ. ജൂൺ ഒമ്പതിന് നടക്കുന്ന ഫൈനൽ പോരാട്ടത്തിൽ പോർച്ചുഗൽ സ്പെയ്നിനെയാണ് നേരിടുക. സെമി ഫൈനലിൽ ഫ്രാൻസിനെ 5-4 എന്ന ആവേശകരമായ സ്കോറിന് പരാജയപ്പെടുത്തിയാണ് നിലവിലെ യൂറോ ചാമ്പ്യന്മാർ ഫൈനൽ യോഗ്യത ഉറപ്പിച്ചത്. ജർമ്മനിയെ ഒന്നിനെതിരെ രണ്ടു ഗോളുകൾക്ക് തകർത്ത റൊണാൾഡോയും സംഘവും ഫൈനലിലേക്ക് മുന്നേറിയത്. മത്സരത്തിൽ ഒരു ഗോളിന് പുറകിൽ നിന്ന് ശേഷമായിരുന്നു പോർച്ചുഗൽ വിജയം പിടിച്ചെടുത്തത്. മത്സരത്തിൽ പോർച്ചുഗലിനായി വിജയഗോൾ നേടിയത് റൊണാൾഡോയായിരുന്നു.

അടുത്ത വർഷം നടക്കുന്ന ഫിഫ ലോകകപ്പിലും റൊണാൾഡോ കളിക്കുമെന്നാണ് പ്രതീക്ഷിക്കുന്നത്. ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്.