അഹമ്മദാബാദ്: എയര്‍ ഇന്ത്യ വിമാനം ഇടിച്ചിറങ്ങിയുണ്ടായ അപകടത്തില്‍ ചികിത്സയില്‍ കഴിയുന്ന പന്ത്രണ്ട് വിദ്യാര്‍ഥികളുടെ ആരോഗ്യ നില ഗുരുതരമായി തുടരുന്നു. ഇവരെ സമീപത്തുള്ള വിവിധ ആശുപത്രികളിലായാണ് പ്രവേശിപ്പിച്ചിരിക്കുന്നത്. വിമാനം ഇടിച്ചിറങ്ങിയ മേഘാനി നഗറിലെ ബിജെ ഹോസ്പിറ്റല്‍ ഹോസ്റ്റലിലുണ്ടായിരുന്നവരാണ് വിദ്യാര്‍ഥികളെന്നാണ് റിപ്പോര്‍ട്ട്. 

ഇന്നലെ ഉച്ചയ്ക്ക് 1.38 ഓടെയാണ് അഹമ്മദാബാദിലെ സര്‍ദാര്‍ വല്ലഭായ് പട്ടേല്‍ വിമാനത്താവളത്തില്‍ നിന്ന് ലണ്ടനിലേക്ക് പുറപ്പെട്ട എയര്‍ ഇന്ത്യ വിമാനം അപകടത്തില്‍പ്പെട്ടത്. റണ്‍വേയില്‍ നിന്ന് പറന്നുയര്‍ന്ന ഉടനെ നിയന്ത്രണം നഷ്ടപ്പെട്ട വിമാനം സമീപത്തുണ്ടായിരുന്ന ഹോസ്റ്റല്‍ കെട്ടിടത്തിന് മുകളില്‍ തകര്‍ന്ന് വീഴുകയായിരുന്നു. ഉച്ചഭക്ഷണ സമയമായതിനാല്‍ മെസില്‍ നിരവധി വിദ്യാര്‍ഥികളുണ്ടായിരുന്നതയാണ് റിപ്പോര്‍ട്ട്. ഇതിനകം 5 എംബിബിഎസ് വിദ്യാര്‍ഥികള്‍ കൊല്ലപ്പെട്ടതായാണ് സ്ഥിരീകരണം. മാത്രമല്ല 50 ഓളം വിദ്യാര്‍ഥികള്‍ മരണപ്പെട്ടതായി സ്ഥിരീകരിക്കാത്ത റിപ്പോര്‍ട്ടുമുണ്ട്.

ALSO READ: Ahmedabad Plane Crash: വിമാനദുരന്തം: മരിച്ച യാത്രക്കാരുടെ പേരും രാജ്യവും 

അതേസമയം അഹമ്മദാബാദ് വിമാന ദുരന്തത്തില്‍ ഇതുവരെ 265 മൃതദേഹങ്ങള്‍ ആശുപത്രിയില്‍ എത്തിച്ചതായി പൊലിസ്. തിരച്ചില്‍ പുരോഗമിക്കുകയാണെന്നും, കൂടുതല്‍ മൃതദേഹങ്ങള്‍ ലഭിക്കാന്‍ സാധ്യതയുണ്ടെന്നും ഡെപ്യൂട്ടി പൊലിസ് കമ്മീഷണര്‍ കനന്‍ ദേശായിയെ ഉദ്ധരിച്ച് പിടി ഐ റിപ്പോര്‍ട്ട് ചെയ്തു. അതേസമയം 290ലധികം പേര്‍ മരിച്ചതായി റോയിട്ടേഴ്‌സ് റിപ്പോര്‍ട്ട് ചെയ്തു. 

വിമാനത്തില്‍ ആകെ 242 പേരാണ് ഉണ്ടായിരുന്നത്. വിമാനം തകര്‍ന്ന് വീണ മെഡിക്കല്‍ കോളജ് ഹോസ്റ്റല്‍ കെട്ടിടത്തിലുണ്ടായിരുന്ന 5 പേരും, 24 പ്രദേശവാസികളും മരിച്ചതായാണ് കണ്ടെത്തല്‍. 

അതേസമയം, തകര്‍ന്നുവീണ ബോയിങ് 787 ഡ്രീംലൈനര്‍ വിമാനത്തിന്റെ ബ്ലാക്ക് ബോക്‌സ് കണ്ടെത്തി. അപകടം നടന്ന് 9 മണിക്കൂറിന് ശേഷമാണ് ബ്ലാക്ക് ബോക്‌സ് കണ്ടെത്തിയത്. പിന്‍ഭാഗത്തുള്ള ബ്ലാക്ക് ബോക്‌സ് ആണ് കണ്ടെത്തിയത്. ഇനി ഒരെണ്ണം കൂടെ കണ്ടെത്താനുണ്ട്. ബ്ലാക് ബോക്‌സ് കേന്ദ്രീകരിച്ച് നടത്തുന്ന അന്വേഷണത്തില്‍ കൂടുതല്‍ വിവരങ്ങള്‍ ലഭ്യമാവും.

ahmedabad Air disaster condition of twelve students under treatment is critical