കോതമംഗലം: റാഡോ ടയേഴ്‌സിലെ തൊഴിലാളികള്‍ക്ക് ബോണസ് നിഷേധിച്ചതില്‍ പ്രതിഷേധിച്ച് എട്ടുമുതല്‍ അനിശ്ചിതകാല പണിമുടക്ക് നടത്തും. വിവിധ യൂണിയനുകള്‍ ബോണസും മറ്റ് ആനുകൂല്യങ്ങളും ആവശ്യപ്പെട്ട് കഴിഞ്ഞ മാസം നോട്ടീസ് നല്‍കിയിരുന്നു. മൂന്നിന് ജില്ലാ ലേബര്‍ ഓഫിസറുടെ സാന്നിധ്യത്തില്‍ നടന്ന ചര്‍ച്ചയില്‍ മാനേജ്‌മെന്റ് നിഷേധ നിലപാട് സ്വീകരിച്ചതിനാല്‍ തീരുമാനമായില്ല.
ലാഭകരമായ നിലയില്‍ പ്രവര്‍ത്തിക്കുന്ന ടയര്‍ നിര്‍മ്മാണ കമ്പനിയായ സിയറ്റിന്റെ മാനേജ്‌മെന്റില്‍ നിന്നാണ് ഇത്തരം നടപടിയെന്ന് ട്രേഡ് യൂനിയന്‍ നേതാക്കള്‍ പറഞ്ഞു. സംയുക്ത ട്രേഡ് യൂനിയന്റെ നേതൃത്വത്തില്‍ തുടര്‍ ദിവസങ്ങളില്‍ സമര പ്രചരണമാരംഭിക്കുമെന്നും അവര്‍ അറിയിച്ചു.