കൊച്ചി: ദുരന്ത നിവാരണ നിയമത്തിൽ നിന്നും ബന്ധപ്പെട്ട വകുപ്പ് ഒഴിവാക്കിയെന്ന പേരിൽ വയനാട് ഉരുൾപൊട്ടൽ ദുരന്ത ബാധിതരുടെ വായ്പകൾ എഴുതി തള്ളാൻ ബാങ്കുകളോട് ആവശ്യപ്പെടാൻ സാധിക്കില്ലെന്ന കേന്ദ്ര നിലപാടിനെതിരെ വിമർശനവുമായി ഹൈക്കോടതി. കേന്ദ്ര സർക്കാരിന് ഇത്തരത്തിലുള്ള നിലപാട് സ്വീകരിക്കാൻ കഴിയില്ല.

ഭരണഘടനയുടെ എഴുപത്തി മൂന്നാം അനുച്ഛേദ പ്രകാരം എക്സിക്യൂട്ടീവ് അധികാരം ഉപയോഗിച്ചുകൊണ്ട് ബാങ്കുകൾക്ക് നിർദേശം നൽകാൻ കേന്ദ്രത്തിന് സാധിക്കും. ഇതിൽ വായ്പ എഴുതി തള്ളുമോയെന്നാണ് കോടതിക്ക് അറിയേണ്ടത്. ഇക്കാര്യത്തിൽ മൂന്ന് ആഴ്ചകൾക്കുള്ളിൽ തീരുമാനം അറിയിക്കാണാനാണ് പ്രത്യേക ബെഞ്ച് ആവശ്യപ്പെട്ടത്. ജസ്റ്റിസ് എകെ ജയശങ്കരൻ നമ്പ്യാർ, ജസ്റ്റിസ് പിഎം മനോജ് എന്നിവരാണ് ബെഞ്ചിലുള്ളത്. 

വായ്പ എഴുതി തള്ളുന്ന കാര്യത്തിൽ ദേശിയ ദുരന്ത നിവാരണ അതോറിറ്റിയോടും കേന്ദ്രത്തിനോടും ഏപ്രിൽ പത്തിന് കോടതി വിശദീകരണം ആവശ്യപ്പെട്ടിരുന്നു. ഇതിന് വ്യവസ്ഥയില്ലെന്നാണ് എൻഡിഎംഎ സത്യവാങ്മൂലം നൽകിയത്. ദുരന്ത നിവാരണ നിയമത്തിലെ പതിമൂന്നാം വകുപ്പ് പ്രകാരമാണ് വായ്പകൾ എഴുതി തള്ളിയിരുന്നത്. എന്നാൽ 2025ലെ നിയമ ഭേദഗതിയിൽ ഈ വകുപ്പ് ഒഴിവാക്കിയെന്നും എൻഡിഎംഎ ബോധിപ്പിച്ചു. ഓരോ ദുരന്തം നടക്കുമ്പോഴും വായ്പ എഴുതി തള്ളാൻ ബാങ്കുകളെ നിർബന്ധിക്കാൻ കഴിയില്ലെന്നാണ് കേന്ദ്രം വ്യക്തമാക്കിയിരുന്നത്. ഇതിനെയാണ് കോടതി വിമർശിച്ചത്. 

കേന്ദ്ര സർക്കാരിന് വലിയ അധികാരമുള്ള ഫെഡറൽ സ്വഭാവമുള്ള രാജ്യത്ത് ഇത്തരത്തിലുള്ള ഒരു നിലപാട് സ്വീകരിക്കരുതെന്നും ദുരന്ത നിവാരണ നിയമത്തിന്റെ ഭാഗമായി അല്ലാതെ തന്നെ ബാങ്കുകൾക്ക് നിർദേശം നൽകാൻ കേന്ദ്രത്തിന് അധികാരമുണ്ടെന്നും കോടതി പറഞ്ഞു. സർക്കാരിന് ഇക്കാര്യത്തിൽ തീരുമാനം എടുക്കാനുള്ള പ്രത്യേക അധികാരമുണ്ടെങ്കിലും  ഇത് നയപരമായ തീരുമാനത്തിന്റെ ഭാഗമായിട്ടാകണമെന്ന് അഡീഷണൽ സോളിസിറ്റർ ജനറൽ അറിയിച്ചു. 

High Court criticizes Centre for loan waiver for Wayanad disaster victims If not show courage to say so says Centre