ന്യൂഡൽഹി: ആധാർ കാർഡ് വിശദാംശങ്ങൾ ഓൺലൈനായി സൗജന്യമായി അപ്‌ഡേറ്റ് ചെയ്യാനുള്ള സമയപരിധി യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) വീണ്ടും ഒരു വർഷത്തേക്ക് നീട്ടി. 2026 ജൂൺ 14 വരെ ആധാർ കാർഡ് ഉടമകൾക്ക് ഫീസ് നൽകാതെ തങ്ങളുടെ വിവരങ്ങൾ പുതുക്കാം. ഇന്ന് (ജൂൺ 14) സമയപരിധി അവസാനിക്കാനിരിക്കെയാണ് കേന്ദ്രം ഈ തീരുമാനം പ്രഖ്യാപിച്ചത്.

നേരത്തെ നിരവധി തവണ സൗജന്യ അപ്‌ഡേറ്റിന്റെ സമയപരിധി കേന്ദ്രം നീട്ടിയിരുന്നു. ഈ സൗകര്യം നീട്ടിയില്ലായിരുന്നെങ്കിൽ, ജൂൺ 14ന് ശേഷം വിവരങ്ങൾ പുതുക്കാൻ ഫീസ് നൽകേണ്ടി വരുമായിരുന്നു. ലക്ഷക്കണക്കിന് ആധാർ കാർഡ് ഉടമകൾക്ക് പ്രയോജനം ലഭിക്കുന്നതിനാണ് സമയപരിധി വീണ്ടും നീട്ടിയതെന്ന് യുഐഡിഎഐ അറിയിച്ചു.

 

 

മൈആധാർ പോർട്ടൽ വഴി മാത്രമാണ് സൗജന്യ സേവനം ലഭ്യമാകുക. ആധാർ എടുത്ത് 10 വർഷം പൂർത്തിയായവർ വിവരങ്ങൾ അപ്‌ഡേറ്റ് ചെയ്യണമെന്നാണ് യുഐഡിഎഐയുടെ നിർദേശം, എങ്കിലും ഇത് നിർബന്ധമല്ല. പേര്, വിലാസം, ജനനത്തീയതി തുടങ്ങിയ വിശദാംശങ്ങൾ യുഐഡിഎഐയുടെ ഔദ്യോഗിക വെബ്‌സൈറ്റിലെ പോർട്ടൽ വഴി ഓൺലൈനായി സൗജന്യമായി പുതുക്കാം.

എന്നാൽ, ഫോട്ടോ, ബയോമെട്രിക് വിവരങ്ങൾ, ഐറിസ് തുടങ്ങിയവ അപ്‌ഡേറ്റ് ചെയ്യാൻ ആധാർ കേന്ദ്രങ്ങൾ നേരിട്ട് സന്ദർശിക്കണം. 2016ലെ ആധാർ എൻറോൾമെന്റ് ആൻഡ് അപ്‌ഡേറ്റ് റെഗുലേഷൻസ് പ്രകാരം, ആധാർ എൻറോൾമെന്റ് തീയതി മുതൽ 10 വർഷം കഴിയുമ്പോൾ ഐഡന്റിറ്റി പ്രൂഫ് (പിഒഐ), അഡ്രസ് പ്രൂഫ് (പിഒഎ) എന്നിവ അപ്‌ഡേറ്റ് ചെയ്യണമെന്ന് നിർദേശിക്കുന്നു. കൂടാതെ, 5 മുതൽ 15 വയസ്സിനിടയിലുള്ള കുട്ടികളുടെ ആധാർ വിവരങ്ങളും ഈ കാലയളവിൽ പുതുക്കണമെന്നും വ്യവസ്ഥയുണ്ട്.