ന്യൂഡല്‍ഹി: ഉത്തരാഖണ്ഡില്‍ വീണ്ടും ഹെലികോപ്ടര്‍ അപകടം. കേദാര്‍നാഥില്‍ നിന്ന് ഗുപ്തകാശിയിലേക്ക് പോയ ഹെലികോപ്ടറാണ് അപകടത്തില്‍ പെട്ടത്. അഞ്ച് പേര്‍ മരണപ്പെട്ടതായാണ് റിപ്പോര്‍ട്ട്. പൈലറ്റ് അടക്കം ഏഴുപേരാണ് ഹെലികോപ്ടറില്‍ ഉണ്ടായിരുന്നത്. ആര്യന്‍ ഏവിയേഷന്റെ ഹെലികോപ്ടറാണ് അപകടത്തില്‍ പെട്ടത്. 

കേദാര്‍നാഥില്‍ നിന്ന് തീര്‍ഥാടകരുമായി ഗുപ്തകാശിയിലേക്ക് പോകുന്നതിനിടെയായിരുന്നു അപകടം. മോശം കാലാവസ്ഥ മൂലമാണ് അപകടമുണ്ടായതെന്നാണ് സൂചന. ഹെലികോപ്ടര്‍ നിയന്ത്രണംവിട്ട് ഗൗാരികുണ്ഡിന് സമീപം വീഴുകയായിരുന്നുവെന്നാണ് റിപ്പോര്‍ട്ട്.  കഴിഞ്ഞ കുറേ ദിവസങ്ങളായി മേഖലയിലെ കാലാവസ്ഥ മോശമായിരുന്നു. 

അപകടമുണ്ടായ സ്ഥലത്ത് രക്ഷാപ്രവര്‍ത്തനം നടത്തുന്നതിനായി പ്രത്യേക സംഘത്തെ അയച്ചിട്ടുണ്ടെന്ന് ഉത്തരാഖണ്ഡ് എ.ഡി.ജി.പി ഡോ.വി മുരുകേശന്‍ അറിയിച്ചു. അപകടം സംബന്ധിച്ച് കൂടുതല്‍ വിവരങ്ങള്‍ പുറത്ത് വന്നിട്ടില്ല. പ്രദേശത്ത് രക്ഷാപ്രവര്‍ത്തനം പുരോഗമിക്കുകയാണെന്നും അധികൃതര്‍ അറിയിച്ചു.