ഡെറാഡൂണ്‍: ഉത്തരാഖണ്ഡില്‍ ഹെലികോപ്റ്റര്‍ തകര്‍ന്നുവീണ് 7 മരണം. കേദാര്‍നാഥ് ധാമില്‍ നിന്ന് ഗുപ്തകാശിയിലേക്ക് പോയ ഹെലികോപ്റ്ററാണ് ഉത്തരാഖണ്ഡിലെ ഗൗരികുണ്ഡില്‍ വെച്ച് തകര്‍ന്നുവീണത്. ഞായറാഴ്ച പുലര്‍ച്ചെ 5:20 ഓടെയാണ് അപകടം നടന്നത്.

ഗുപ്തകാശിയില്‍ നിന്ന് പുലര്‍ച്ചെ 05:10ന് ഹെലികോപ്റ്റര്‍ പറന്നുയര്‍ന്ന് 05:18ന് കേദാര്‍നാഥ് ഹെലിപാഡില്‍ ഇറങ്ങി. 05:19ന് ഹെലികോപ്റ്റര്‍ വീണ്ടും പറന്നുയര്‍ന്ന് ഗൗരികുണ്ഡിന് സമീപം തകര്‍ന്നുവീഴുകയായിരുന്നു എന്നാണ് വിവരം.

ആര്യന്‍ ഏവിയേഷന്‍ ഗുപ്തകാശി സര്‍വീസ് നടത്തുന്ന ഹെലികോപ്റ്ററാണ് തകര്‍ന്നുവീണത്. 
തീര്‍ത്ഥാടകരെകൊണ്ട് ഗുപ്തകാശിയിലേക്ക് പോയ ഹെലികോപ്റ്റര്‍ ഗൗരികുണ്ഡില്‍ വെച്ച് തകര്‍ന്നുവീഴുകയായിരുന്നുവെന്ന് ഇന്‍സ്‌പെക്ടര്‍ ജനറല്‍ രാജീവ് സ്വരൂപ് പറഞ്ഞു.

'ജില്ലാ പൊലിസിനെ അപകടത്തെക്കുറിച്ച് അറിയിച്ചിട്ടുണ്ട്. രക്ഷാപ്രവര്‍ത്തനത്തിനായി സംഘങ്ങള്‍ പുറപ്പെട്ടിട്ടുണ്ട്,' ദേശീയ ദുരന്ത നിവാരണ സേന (എന്‍ഡിആര്‍എഫ് ) വൃത്തങ്ങള്‍ പറഞ്ഞു.

ALSO READ: ഉത്തരാഖണ്ഡില്‍ വീണ്ടും ഹെലികോപ്ടര്‍ അപകടം; അഞ്ച് മരണം

ഹെലികോപ്റ്ററില്‍ ഏഴ് പേര്‍ ഉണ്ടായിരുന്നുവെന്ന് എന്‍ഡിആര്‍എഫ് വൃത്തങ്ങള്‍ അറിയിച്ചു. പൈലറ്റ് രാജ്വീര്‍, ബികെടിസിയിലെ താമസക്കാരനായ വിക്രം റാവത്ത്, റാസി ഉഖിമത്ത്, വിനോദ്, ട്രിസ്റ്റ് സിംഗ്, രാജ്കുമാര്‍, ശ്രദ്ധ, 10 വയസ്സുകാരിയായ റാഷി എന്നിവരാണ് ഹെലികോപ്റ്ററില്‍ ഉണ്ടായിരുന്നത്.

സംഭവത്തില്‍ ഏഴ് പേര്‍ കൊല്ലപ്പെട്ടതായി ഉദ്യോഗസ്ഥര്‍ വാര്‍ത്താ ഏജന്‍സിയായ പിടിഐയോട് പറഞ്ഞു.

'മോശം കാലാവസ്ഥയെത്തുടര്‍ന്ന് കേദാര്‍നാഥില്‍ നിന്ന് മടങ്ങുമ്പോള്‍ ആര്യന്‍ ഏവിയേഷന്‍ ഗുപ്തകാശി സര്‍വീസ് നടത്തുന്ന ഒരു ഹെലികോപ്റ്റര്‍ തകര്‍ന്നുവീണുവെന്നും പെലികോപ്റ്ററില്‍ അഞ്ച് തീര്‍ത്ഥാടകരും ഒരു കുട്ടിയും ഒരു പൈലറ്റും ഉണ്ടായിരുന്നു. രക്ഷാപ്രവര്‍ത്തനം പുരോഗമിക്കുകയാണ്,' രുദ്രപ്രയാഗിലെ ജില്ലാ ടൂറിസം ഓഫീസര്‍ രാഹുല്‍ ചൗബെ പറഞ്ഞു.

സംഭവത്തില്‍ ഉത്തരാഖണ്ഡ് മുഖ്യമന്ത്രി പുഷ്‌കര്‍ സിംഗ് ധാമി അനുശോചനം രേഖപ്പെടുത്തി.